Basketboldan Ulttyq mektep lıgasynyń jeńimpazy anyqtaldy
ACTANA. KAZINFORM – Qazaqstan astanasynda basketboldan Ulttyq mektep lıgasynyń fınaldyq kezeńi máresine jetti.
Jarystar Qazaqstan Ulttyq Olımpıadalyq komıtetiniń qoldaýymen ótti. Sonymen qatar elimizdiń ár óńirinen úzdik komandalar jınaldy.
Aqtyq syn – elimizdegi myńdaǵan mektep pen mıllıondaǵan oqýshyny qamtyǵan aýqymdy respýblıkalyq jobanyń sharyqtaý shegine aınaldy.
Basketbol jarysynda Túrkistan oblysynan kelgen Dalabazar mektebiniń oqýshylary jeńiske jetti. Kúmis júldeni Jambyl oblysyndaǵy №24 mektep-gımnazııasy ıelendi. Astana qalasyndaǵy №62 mektep-lıtseıiniń jas basketbolshylary úzdik úshtikti túıindedi.
Marapattaý rásimine Qazaqstan UOK-niń Bas hatshysy Álimjan Aqaev qatysty.
– Halyqaralyq Olımpıada kúni qarsańynda Ulttyq mektep lıgasyn ótkizý - erekshe mánge ıe. Bul jaı ǵana sporttyq jarys emes, bul – ósip kele jatqan urpaqtyń boıynda olımpıadalyq qozǵalystyń negizi bolyp sanalatyn qundylyqtardy: úzdiksiz damý, ózara qurmet pen ádildikti – qalyptastyrý jolyndaǵy mańyzdy qadam.
Biz mundaı bastamalar arqyly deni saý ári belsendi qoǵamnyń berik irgetasyn qalaý múmkin ekenine senimdimiz, - dedi Álimjan Aqaev.
Aıta keteıik, 2025 jyly Ulttyq mektep lıgasy 23 maýsymda atap ótiletin Halyqaralyq Olımpıada kúnine arnalǵan is-sharalar aıasynda ótip jatyr. Bul jobanyń olımpıadalyq qundylyqtardy qalyptastyrýdaǵy mańyzyn aıqyndaı túsedi.
Ulttyq mektep lıgasynyń baǵdarlamasyna ártúrli sport túrleri engen: ústel tennısi, basketbol, voleıbol, toǵyzqumalaq, fýtzal, jeńil atletıka, gandbol, asyq atý, shahmat jáne fýtbol.