Basketboldan Qazaqstan Kýbogynyń jeńimpazy anyqtaldy
ASTANA. QazAqparat - «Astana» men «Atyraý barystary» komandalary Basketboldan Qazaqstan Kýbogynyń fınalynda kezdesti.
Bul matchtyń sheshýshi fınal ekeni alǵashqy mınýttardan-aq sezildi. Komandalardyń jeńiske degen yntalary zor boldy. Oıynnyń birinshi jartysy «Astana» komandasynyń jeńisimen aıaqtaldy. Matchtyń úshinshi kezeńinde de atyraýlyqtar astanalyqtardy qýyp jete almady. Úshinshi kezeńde 38:47 esebimen «Astana» basymdyq tanytty, - dep habarlaıdy Almaty qalalyq Dene shynyqtyrý jáne sport basqarmasynyń baspasóz qyzmeti.
Foldar sany jaıly aıtatyn bolsaq, eki komanda da birdeı fol sanyn jasady dep aıtýǵa bolady. Ásirese, kezdesýdiń sońynda sharshaǵan oıynshylar birinen soń biri eskertýler aldy.
Jalpy, «Astana» komandasy tartysty, qyzyqty da kórnekti oıyn úlgisin kórsetti. Fınaldaǵy match 46:66 esebimen aıaqtaldy. Qazaqstan Kýbogyn «Astana» basketbol komandasy jeńip aldy.
Odan bólek, Kýbok 2017 fınalynyń birinshi matchynda jartylaı fınaldyń jeńimpazdary kezdesti. Qostanaılyq «Tobyl» men aqtaýlyq «Kaspıı» komandalary týrnırdiń júldeli oryndaryn sarapqa saldy. Fınaldaǵy match qyzyqty da tartysty ótti.
Esepti «Kaspıı» komandasy ashyp, alǵa umtyldy. Alǵashqy on mınýttyq 16:19 esebimen aıaqtaldy. Alaıda, birinshi taım- aýtqa komandalar 46:45 esebimen shyqty. Oıynnyń ekinshi kezeńi «Tobyldyń» jeńisimen aıaqtaldy. Tórtinshi kezeńde «Tobyl» komandasy «Kaspıılikterdi» qýyp jete almady. Kezdesý aqtaýlyq «Kaspııdiń» jeńisimen aıaqtaldy. Esep - 86:99. Fınaldyń birinshi matchynda «Kaspıı» komandasy qostanaılyqtardy jeńip shyqty. Sonymen, fınaldyń birinshi match nátıjeleri boıynsha ázirge aqtaýlyqtar alda kele jatyr.
«Almatylyq Legıon» men «Qapshaǵaı» basketbol komandalary Dostyq sport kesheninde kezdesip, besinshi oryndy sarapqa saldy. Álbette, eki komanda da órnekti oıyn úlgisin kórsetýge tyrysty. Oıynnyń alǵashqy mınýttarynan «Almatylyq legıon» alǵa umtyldy, oıynnyń birinshi jartysy 41:46 esebimen aıaqtalyp, almatylyqtar basymdyq tanytty. Kezdesý 66:90 esebimen, «Almatylyq legıonnyń» jeńisimen aıaqtaldy. Osylaısha, «Almatylyq legıon» Qazaqstan 2017 kýbogynyń 5 oryn ıegeri atandy.
Sonymen qatar, basketboldan Qazaqstan Kýbogynyń úzdik oıynshylary anyqtaldy. Olar:Eń úzdik shıratýshy - Rústem Murzaǵalıev (Astana), eń úzdik shabýyldaýshy qorǵaýshy - Rýstam Erǵalı (Astana), eń úzdik jeńil forvard - Pavel Ilın (Atyraý Barystary), eń úzdik aýyr forvard - Anton Ponomarev (Astana), eń úzdik ortalyq sheptegioıynshy - Vsevolod Fadeıkın (Almatylyq Legıon).
