Basketboldan erler arasyndaǵy ulttyq qurama komandasy Qytaıda ótetin 16-shy Jazǵy Azııa oıyndaryna bara almaı qalýy múmkin
STANA. Mamyrdyń 3-i. QazAqparat /Gúlmıra Álıakparova/ - Basketboldan erler arasyndaǵy ulttyq qurama komandasy jattyqtyrýshynyń bolmaýynan, ústimizdegi jyldyń qarasha aıynda Gýandjoý qalasynda (Qytaı) ótetin 16-shy Jazǵy Azııa oıyndaryna bara almaı qalýy múmkin. Bul týraly Astanada ótken baspasóz máslıhatynda málim boldy.
16-shy Jazǵy Azııa oıyndaryna Qazaqstannyń basketboldan erler jáne áıelder arasyndaǵy qurama komandalary, ár komandadan segiz oıynshydan jasaqtap attanýy tıis. Eki quramanyń da basym denin Qazaqstan chempıonaty men Kýbogyn birneshe jyl boıy eshkimge bermeı kele jatqan - «Astana jolbarystary» basketbol klýbynyń sportshylary quraıdy.
«Búgingi kúni erlerdiń ulttyq quramasyn jattyqtyratyn bapker joq. Olarda eshqandaı josparlar men baǵdarlamalar joq. Federatsııa men ulttyq quramalarǵa jaýap beretin sport vedomstvolary basketbolǵa bólip otyrǵan qarajattardyń mardymsyzdyǵy sonshalyq, ol aqsha eki quramaǵa jaqsy kıim alyp berýge jáne olarmen oqý-jattyǵý ótkizý úshin ǵana jetedi», - dep atap ótti «Astana jolbarystary» BK erler komandasynyń bas bapkeri Vıtalıı Strebkov.
BK-nyń dırektory Valerıan Koptelovtyń sózine qaraǵanda, áıelder quramasyn Jazǵy Azııa oıyndaryna daıyndap jatqan jattyqtyrýshy bolǵanymen, qarajattyń joqtyǵynan olar da bul halyqaralyq dodaǵa bara almaı qalýy múmkin.
