Basketboldan balalar úıleri men mektep-ınternat tárbıelenýshileri arasyndaǵy «Úmit kýbogy» el chempıonatynyń І týry aıaqtaldy
ALMATY. 30 qazan. QazAqparat - Qostanaı oblysyndaǵy «Sosnovyı bor» shıpajaıynda 21-30 qazan kúnderi basketboldan balalar úıleri men mektep-ınternat tárbıelenýshileri arasyndaǵy «Úmit kýbogy» Qazaqstan chempıonatynyń 2012-2013 jyldardaǵy jańa maýsymyndaǵy I týry ótti.
Qazaqstan halyq bankiniń qamqorlyǵyndaǵy 17 balalar úıi men mektep-ınternattarynan 170 jasóspirim qatysqan bul jarystyń jeńimpazy 2013 jyldyń kókteminde ótetin 2-shi týrda belgili bolady. Alǵashqy týrda alǵalyq Aman Músirálıev eń úzdik nátıjeli oıyn kórsetken basketbolshy, almatylyq Rahym Ashırov jeńiske degen erekshe umtylysy úshin, astanalyq Ivan Vaıs úzdik shabýylshy, óskemendik Sergeı Ivanov úzdik qorǵaýshy, pavlodarlyq Ilıa Vashýrın úzdik ortalyq oıynshy, al qyzyljarlyq Aleksandr Ivanov úsh upaılyq dop laqtyrý boıynsha úzdik oıynshy dep tanyldy.
Ótken maýsymda Qostanaı oblystyq balalar úıiniń komandasy jeńimpaz atanǵan bolatyn. Bıylǵy chempıonatta alǵashqy týrda ázirge aıqyn kóshbasshy anyqtalǵan joq. Onda qostanaılyqtarmen qatar Qyzyljar, Astana, Taraz qalalary men Aqtóbe oblysyndaǵy Alǵa jáne Aqmola oblysyndaǵy Sandyqtaý qalalarynyń komandalary jaqsy nátıjeler kórsetti.
