Basketboldan «Astana» komandasy Bolashaq oıyndary-2025 týrnırine joldama jeńip aldy
ASTANA. KAZINFORM – Basketboldan Qazaqstan ulttyq quramasynyń oıynshylary qatysqan RVC ASTANA klýby Bolashaq oıyndary-2025 týrnırine irikteý kezeńiniń fınalynda jeńiske jetti, dep habarlaıdy elorda ákimdiginiń resmı saıty.
«Astana» komandasynyń sapynda ulttyq qurama oıynshylary – Rýslan Aıtqalı men Asqar Maıdekın de bar. Dál osy komanda bıyl jeltoqsan aıynda Ábý-Dabıde ótetin halyqaralyq mýltısporttyq fıdjıtal týrnırde elimizdiń namysyn qorǵaıdy.
RVC Astana komandasy fıdjıtal basketboldyń eki baǵyty – dástúrli (fızıkalyq) jáne tsıfrlyq formattarynda da joǵary deńgeı kórsetti. Olar qarsylastaryn tek alańda ǵana emes, vırtýaldy keńistikte de jeńdi.
Ekinshi oryndy Almaty qalasynyń atynan synǵa túsken Saubol Basketball komandasy ıelendi. Bul komandanyń quramynda da respýblıkalyq jáne halyqaralyq jarystarda júldeli bolǵan, kıberbasketbol boıynsha Qazaqstan quramasynyń músheleri boldy.
– Bul – otandyq sport úshin tarıhı sát. Ulttyq quramanyń oıynshylary óner kórsetken komanda dástúrli sporttaǵy sheberlikti zamanaýı tsıfrlyq múmkindiktermen ushtastyra alatynyn dáleldedi. Shynaıy jáne vırtýaldy alańda qatar oınap, jeńiske jete bilý kásibı sportshylarǵa jańa baǵyttar men tyń múmkindik ashady. Biz jeńimpaz komandalardyń Ábý-Dabıde Qazaqstandy laıyqty tanystyryp, álemniń túkpir-túkpirinen kelgen fıdjıtal sportshylarǵa osal qarsylas bolatynyna senimdimiz, - dedi Bolashaq oıyndary-2026 týrnırin uıymdastyrý jáne ótkizý dırektsııasynyń basshysy Álibek Hasenov.
Aıta keteıik, Road to Abu Dhabi irikteý týrnıri Astanadaǵy J.Úshkempirov atyndaǵy Jekpe-jek saraıynda ótti. Jarys fıdjıtal fýtboldan jáne fıdjıtal basketboldan uıymdastyryldy jáne ol Qazaqstan klýbtary úshin Games of the Future 2025 týrnırine qatysýdyń basty kezeńi sanalady. Buǵan deıin atap ótkenimizdeı, Ábý-Dabıdegi jarysqa Qazaqstan atynan 3 komanda qatysady dep josparlanǵan. Olardyń biri xGod komandasy – 2024 jyly Qazanda ótken týrnırde fıdjıtal shýter baǵyty boıynsha jeńiske jetip, joldama ıelengen bolatyn. Al qaraǵandalyq UEL Team fıdjıtal fýtbol komandasy osy irikteý týrnırinde top jaryp, Bolashaq oıyndary-2025 dodasyna qatysý quqyǵyna ıe boldy.
Aıta keteıik, fıdjıtal sport baǵytyndaǵy alǵashqy halyqaralyq mýltısporttyq týrnır 2024 jyly Qazan qalasynda ótti. Ekinshi týrnır bıyl Ábý-Dabıde uıymdastyrylady. Al kelesi jyldyń jazynda Bolashaq oıyndary-2026 fıdjıtal jarys Astanada ótedi. Týrnırge álemniń 100-ge jýyq elinen sportshylar qatysyp, 13 fıdjıtal dıstsıplına boıynsha baq synaıdy dep kútilip otyr.
Osyǵan deıin jaǵajaı fýtbolynan Qazaqstan quramasy elıtalyq dıvızıonǵa joldama alǵanyn habarlaǵan edik.