Basketbol: Túrkistandyq qyzdar VI jazǵy jastar sport oıyndarynyń jeńimpazy atandy
TÚRKІSTAN. KAZINFORM – Búgin Túrkistan qalasyndaǵy «Balýan Sholaq» sport kesheninde basketboldan qyzdar arasynda VI jazǵy jastar sport oıyndarynyń júldegerleri belgili boldy.
Sportty damytý dırektsııasynyń baspasóz qyzmeti atap ótkendeı, tórt jylda bir ótetin keshendi jarysqa sporttyń bul túrinen 16 komanda (224 sportshy) ózara myqtyny anyqtady.
Fınalda jarys qojaıyny Túrkistan komandasy elordalyq basketbolshylarmen oınap, asa tartysty matchta 76:68 esebimen basym tústi.
Qola medal jolynda Shymkent qalasy men Atyraý oblysynyń komandasy kezdesti. Munda 82:53 esebimen munaıly óńirdiń boıjetkenderi basym boldy. Al úzdik bestikti Jetisý oblysyn aıqyn basymdyqpen jeńgen (esep: 53-35) Aqmola oblysy túıindedi.
Basketboldan osyǵan deıingi V jastar sport oıyndaryn Şýchınsk qalasy qabyldaǵan. Ol kezde qyzdar arasynda 14 komanda jınalyp, Shymkent qalasy chempıon atansa, Astana qalasy men Qostanaı oblysy úzdik úshtikte bolǵan.
Túrki áleminiń rýhanı astanasynda uıymdastyrylǵan basketbol básekesinde barlyq komanda joǵary dárejeli oıyn kórsetti.
Bul sport oıyndary jastardyń sheberligin shyńdap qana qoımaı, olardyń ózara tájirıbe almasýyna, dostyq qarym-qatynas ornatýyna jol ashady. Sonymen qatar aldaǵy ýaqytta halyqaralyq arenalarda el namysyn qorǵaıtyn sportshylardy anyqtaýǵa múmkindik beredi.
Aıta keteıik, tórt jylda bir ótetin jastar sport oıyndaryna 18 jasqa deıingi basketbolshylar qatysty.
Esterińizge sala keteıik, osyǵan deıin qazaqstandyq boksshylardyń «Jibek joly» týrnırindegi alǵashqy qarsylastary anyqtalǵanyn jazǵan edik.