Basketbol: qazaqstandyq oıynshy A. Jıgýlın Ispanııanyń «Barselona» klýbymen kelisimshartqa otyrdy
ASTANA. Mamyrdyń 5-i. QazAqparat /Ernur Aqanbaı/ - Basketboldan Qazaqstannyń jastar quramasynyń oıynshysy 16 jasar Aleksandr Jıgýlın Eýropanyń myqty basketbol klýbtarynyń biri - Ispanııanyń «Barselonasymen» kelisimshartqa otyrdy.
Bul týraly QazAqparat «Bizdiń sport» saıtyna silteme jasap habarlaıdy.
«Bizde bar aqparattar boıynsha, jas shabýylshy Barselonaǵa synaqtan ótý úshin osydan eki aı buryn attanǵan jáne Haver Paskýal jattyqtyratyn komandanyń quramyna kirgen. Jıgýlın óner kórsetken sońǵy qazaqstandyq klýb Qostanaıdyń «Tobyly» bolyp tabylady», delingen «Bizdiń sport» saıtynyń búgingi taratqan habarlamasynda.
Atalmysh saıttyń málimetinshe, osydan bir jyl buryn Jıgýlın Vılnıýstaǵy «Djordan Klassık» atty basketbol lagerinde aıryqsha kózge túsip, juldyzdar matchyna qatysqandardyń arasynan úzdik ondyqtyń qatarynan tabylǵan.
Aıta keteıik, «Barselona» Ispanııadaǵy myqty jáne eń ataqty klýbtardyń biri bolyp sanalady. Ol basketboldan 15 dúrkin el chempıony atanyp, 21 márte Ispanııa kýbogyn jeńip alǵan. Al, 2003 jyly «Barselona» Eýrolıgada top jardy.
