Basketbol: Qazaqstan quramasy úshinshi márte jeńiske jetti
NUR-SULTAN. QazAqparat - Basketboldan Qazaqstan quramasy 2021 jylǵy Azııa kýbogyna irikteý kezeńinde Palestınadan basym tústi, dep habarlaıdy QazAqparat tilshisi.
Esterińizge sala ketelik, qazaqstandyq basketbolshylar F tobynda synǵa túsýde. Qarsylastary - Iordanııa, Palestına jáne Shrı-Lanka quramalary.
Búgin qazaqstandyqtar Palestınany 93:56 esebimen jeńdi.
Toptaǵy alǵashqy oıyndar 2020 jyldyń 21 aqpanynda bastaldy. Sol kúni Qazaqstan Palestınany 79:76 esebimen jeńdi. Odan keıin 24 aqpanda Iordanııaǵa 68:71 esebimen jol berdi.
Budan keıin koronavırýs ınfektsııasyna baılanysty oıyndar keıinge shegerildi. Ol bıylǵy jyldyń 18 aqpanynda qaıta jalǵasty. Qalǵan oıyndardyń barlyǵy Bahreınde ótkiziletin bolyp sheshildi. Sol kúni qazaqstandyq basketbolshylar Shrı-Lankany 111:52 esebimen súrindirdi.
Qazaqstan quramasy tórt oıynnan keıin 7 upaı jınap, kósh basynda tur. Odan keıingi orynda olardan eki oıynnan 4 upaı jınaǵan Iordanııa keledi. Al 3 kezdesý ótkizgen Palestınanyń 4, Shrı-Lankanyń 3 upaıy bar.
Qazaqstan kelesi oıynyn 21 aqpanda Iordanııaǵa qarsy ótkizedi. Al 22 aqpanda Shrı-Lankamen taǵy bir márte sheberlik baıqasady.
Aıta keteıik, Azııa kýbogy 16-28 tamyz aralyǵynda Indonezııada ótedi. Árbir topta birinshi jáne ekinshi oryn alǵan quramalar atalǵan týrnırdiń fınaldyq kezeńine tikeleı joldama alady. Úzdik úshtikke ilikkender qosymsha kezeńde synǵa túsip, joldamalardy sarapqa salady.
