Basketbol: Qazaqstan quramasy Azııa chempıonatynyń jartylaı fınalyna shyqty
ASTANA. QazAqparat - Basketboldan Qazaqstan qyzdar quramasy 18 jasqa deıingi sportshylar arasyndaǵy Azııa chempıonatynyń jartylaı fınalyna joldama aldy, dep habarlaıdy QazAqparat tilshisi.
QR Ulttyq olımpıadalyq komıteti baspasóz qyzmetiniń habarlaýynsha, shırek fınalda Iran quramasymen kezdesken qazaqstandyqtar 71:56 esebimen jeńiske jetti.
Iran quramasy óz tobynda ekinshi oryn ıelenip, kezdesýdiń favorıti sanalǵan bolatyn. Alaıda, toptyq kezeńdegi sátsizdikten soń es jıǵan Qazaqstan komandasy qarsylastarynan aılasyn asyryp ketti.
Búgin Qazaqstan quramasy fınal joldamasyn sarapqa salý úshin Sırııamen kezdesedi.
Aıta keteıik, toptyq kezdesýde Qazaqstan Sırııaǵa 40:56 esebimen jol bergen edi. Endi bizdiń komandanyń ese qaıtaratyn tamasha múmkindigi týdy.
Jartylaı fınaldaǵy kelesi jup - Gonkong pen Úndistan quramalary.
Foto: www.olympic.kz
