Basketbol: «Astana» Qazanda ÝNIKS-ten basym tústi
ASTANA. QazAqparat - «Astana» prezıdenttik basketbol klýby syrt alańda reseılik ÝNIKS komandasynan 98:95 (21:22, 25:25, 26:20, 26:28) esebimen basym tústi, dep habarlaıdy «QazAqparat» «Astana» PBK baspasóz qyzmetine siltememen.
ÝNIKS (14-3) TsSKA-men birinshi orynǵa talasyp jatyr, «Astana» (11-6) da kóshbasshylar qatarynda. Jeńiske jetken jaǵdaıda qazaqstandyq klýb «Hımkımen» teńesip qalar edi.
Oıynnyń birinshi bóligi Emıl Raıkovıchtiń komandasy týrnırlik kestede joǵary satyda kezdeısoq turmaǵanyn kórsetti. Qarsylastar bir-birin alysqa uzatpaı, teń óner kórsetip jatty. Úziliske bir jarym mınýt qalǵanda Entonı Klemmonstyń alystan laqtyrǵan dobynyń arqasynda «Astana» alty upaı alǵa shyqty - 46:40.
Qonaqtardyń basymdyǵy uzaqqa sozylmady. Odan ári qazandyqtar qarsylasyna esh múmkindik bermeı, qatarynan jeti upaı enshiledi. Tóreshiniń ysqyryǵymen qatar Trent Lokettiń dál soqqysy ÝNIKSti esepte alǵa shyǵardy - 47:46.
Úzilisten keıin oıyn órnegi ózgergen joq. Oıyn aıaǵyna taıaý esep - 79:79 boldy.
Sońǵy mınýttarda aqpan aıynyń úzdik oıynshysy atanǵan Perrııa Henrı ÝNIKS oıynynyń tizginin óz qolyna aldy. Qorǵaýshy 9 upaı jınap, qazandyqtardy esepte alǵa shyǵardy (matchtyń aıaqtalýyna deıin bir jarym mınýt qalǵanda esep 91:84 boldy).
Biraq sheshýshi sóz Maıkl Djenkıns pen «Astana» qorǵanysynda qaldy. Qorǵaýshy 8 upaı jınady, onyń ishinde mańyzdy 3 upaılyq ta bar (oıynnyń aıaqtalýyna 33 sekýnd qalǵandaǵy esep - 92:91). Al qonaqtardyń qorǵanysy alań ıeleriniń shabýylshylaryna esh múmkindik bermeı, nátıjesinde olar nebári 4 upaı enshiledi. Sheshýshi sátte qazaqstandyqtar syzyq boıynan dopty dóp túsirip, 98:95 esebimen basym tústi.
Osylaısha, «Astana» maýsymdaǵy 12-jeńisine qol jetkizip, «Hımkımen» teńesti. Qazaqstan chempıondary klýb tarıhyndaǵy úzdik nátıjeni (13) qaıtalaýǵa bir qadam jaqyndady.
