Basqarý júıesindegi jańǵyrýǵa Prezıdenttik jastar kadr rezervi lep beredi – Álıhan Báımenov
ASTANA. KAZINFORM – Sońǵy ýaqytta qoǵamda túbegeıli ózgerister men jańarý úrdisi jalǵasyp jatyr. Elimiz «Ádiletti Qazaqstan», «Jańa Qazaqstan» degen batyl uranmen alǵa bıik maqsattar qoıyp, jahandanýdyń dańǵyl jolynda nyq qadam jasap keledi. Osy rette, Qazaqstannyń memleket qaıratkeri, Astana memlekettik qyzmet Haby (ACSH) basqarýshy komıtetiniń tóraǵasy Álıhan Báımenov agenttik tilshisine Prezıdenttik jastar kadr rezervi jaıly óz oıyn aıtty.
Onyń aıtýynsha, tabıǵattyń da, qoǵamnyń da, kez kelgen júıeniń de jańaryp, jańǵyryp otyrýy – damýdyń sharty.
– Bul – jańa zamanǵa beıimdelýdiń zańdylyǵy. Qazaq «elý jylda el jańa» dese, Uly Abaı «dástúrdiń ozyǵy bar, tozyǵy bar» deıdi. ıAǵnı, tozyǵy jetken dástúrden arylyp turý kerek. Endeshe qoǵam jańǵyryp otyrǵanda soǵan saı qoǵamnyń ortaq isimen aınalysatyn memleket qyzmettiń de jańǵyrý qajettiligi týyndaıdy. Bul bir jaǵynan kúndelikti óz kezeńimen júrip jatatyn konkýrstar arqyly júzege asady. Iá, bosaǵan oryndardy jańa adamdar tolyqtyryp, zeınetke shyqqandardyń ornyna jańa adamdar keledi. Biraq, keıbir tarıhı betburys sátterinde jańa lepti kóbirek alyp kelý memleketter tájirıbesinde bar sheshim. Osy turǵyda Prezıdenttik jastar kadry rezervi jobasyn atap ótýge bolady, – dedi Álıhan Báımenov.
Memleket basshysy óz sózinde: «Prezıdenttik jastar kadr rezerviniń negizgi kózdegen maqsaty – memlekettik apparatty jetildirý jáne basshylardyń jańa býynyna jol ashý. Búgingi jastar – memlekettik basqarý júıesiniń bolashaǵy. Árqaısyńyzdan eldi damytýǵa tyń serpin beretin jańa ıdeıa men nátıjeli jumys kútemiz» dep jastarǵa zor senim artqan bolatyn.
Álıhan Báımenov bul joba buǵan deıin memlekettik qyzmet júıesinde qalyptasqan irikteý, joǵarylatý tetikterine balama emes ekenin atap ótti.
– Bul joba sony tolyqtyrady desek bolady. ıAǵnı, buǵan deıingi irikteý júıelerinde túrli sebeptermen, múmkin saıası dúnıetanymdyq sebeptermen memlekettik qyzmetke barǵysy kelmeı júrgen, jergilikti jerde ıakı ortalyqta bolǵan túrli tosqaýyldarǵa tap bolǵan azamattarǵa tamasha múmkindik. Bul – halyqaralyq tájirıbede bar tetik. Daryny, kúsh-qýaty bar, ózin iri isterdi meńgerýge laıyq sanaıtyn azamattar kúrdeli irikteýden ótedi. Jalpy, bul júıeni durys paıdalana bilse mańyzdy tetik ekenin atap ótken jón, – deıdi ol.
Aıta keteıik, búginde Prezıdenttik jastar kadr rezervinde 400 maman bar. Sonyń 280-i, ıaǵnı 70 paıyzy ortalyq jáne jergilikti atqarýshy organdarda jaýapty laýazymdarǵa taǵaıyndaldy. Birqatary kvazımemlekettik sektorda jáne bıznes salasynda eńbek etip júr.
