Basqarý júıesi durys bolmasa, JI daýa bola almaıdy – Prezıdent
QYZYLORDA. KAZINFORM – Prezıdent Qasym-Jomart Toqaev V Ulttyq quryltaıda tsıfrlyq transformatsııa isinde logıstıkany damytýda jiberilgen qatelikterden sabaq alý kerektigin aıtty.
- Tehnologııa basqarý salasyndaǵy haosty ózdiginen joıa almaıdy. Úderis bastapqyda durys jolǵa qoıylmasa, qaıtalanatyn fýnktsııalar men bıýrokratııalyq áýre-sarsańǵa toly bolsa, jasandy ıntellekti engizý bárine daýa bola almaıdy. Sondyqtan tsıfrlyq transformatsııa strategııalarynyń aldynda basqarý júıesiniń ózin retke keltirý kerek. Budan shuǵyl mindet týyndaıdy: memlekettik sektordaǵy uıymdyq mádenıetti jaqsartý, úzdik basqarý tájirıbeleri men quzyretterin engizý qajet, - dedi Memleket basshysy.
Degenmen Prezıdent tsıfrlyq sheshimder men jasandy ıntellekt kómegimen barlyq salada memlekettik basqarýdyń sapasyn arttyrýǵa bolatynyn aıtty.
- Eń aldymen, bolashaqtyń joǵary tehnologııalyq jáne energııany qajet etetin ekonomıkasy úshin berik ınfraqurylymdyq irgetas qurýǵa nazar aýdarý kerek. Logıstıkada qatelikter jiberýge múlde bolmaıdy. Buǵan deıin qoıma oryndary túrli ýchaskelerde salynyp, sodan keıin ǵana qajetti ınjenerlik jeli tartyldy.
Sonymen qatar, bul nysandar biryńǵaı talaptarǵa jaýap bermeıdi, bul shyǵyndardyń ósýine jáne aýqymdy únemsizdikke ákeldi. Bul basqarýdaǵy saýatsyzdyqtyń mysaly. Sondyqtan muqııat oılastyrylǵan, ortalyqtandyrylǵan tásil qajet, - dedi Qasym-Jomart Toqaev.
Aıta keteıik, Kazinform Memleket basshysynyń Ulttyq quryltaıdaǵy sózin translıatsııalap jatyr.