Basqarý ortalyǵy elden tysqary ornalasqan jabdyqtardy Qazaqstanǵa ákelýge tyıym salyndy
ASTANA. KAZINFORM - Memleket basshysy «Qazaqstan Respýblıkasynyń keıbir zańnamalyq aktilerine baılanys, tsıfrlandyrý, ınvestıtsııalyq ahýaldy jaqsartý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń zańyna qol qoıdy.
Zań baılanys jelilerin tartý, azamattardy tótenshe jaǵdaı qaýpi týraly shuǵyl habardar etý, tótenshe jaǵdaı engizý tetikterin jetildiredi, sondaı-aq Eýrazııa ekonomıkalyq odaǵy aıasyndaǵy taýar tasymalyn qadaǵalaý úshin kóliktiń barlyq túrine navıgatsııalyq plomba ornatý tártibin engizedi (qazirgi kezde plombalar júk tasymaldaıtyn avtokólikterge ornatylady).
Bul normatıvtik qujat baılanys jelileriniń jumysyn qamtamasyz etý úshin basqarý ortalyǵy Qazaqstannan tysqary ornalasqan jabdyqtardy ákelýge tyıym salady.
Sonymen qatar zańda antıfrod-tetigi engizildi.
Onyń aıasynda ınternet-alaıaqtyqqa jáne qarjy uıymdaryn zańǵa qaıshy maqsattarda paıdalanýǵa qarsy shara qoldanylady.
Budan bólek, Densaýlyq saqtaý mınıstrliginiń qyzmetin avtomattandyrýǵa, sonyń ishinde densaýlyq saqtaý uıymdarymen ózara qarym-qatynasty jolǵa qoıýǵa arnalǵan densaýlyq saqtaý ıntegratsııalyq platformasynyń jumysyna qatysty máseleler retteldi.
Tsıfrlyq damý, ınnovatsııalar jáne aeroǵarysh ónerkásibi mınıstrligi múgedektigi bar adamdarǵa jeńildik tarıfterin berý jóninde baılanys operatorlaryna qosymsha mindettemeler belgileý quzyretine ıe boldy.
Zańnyń mátini baspasózde jarııalanady.
