Basqarma basshysy «Rýxanı jańǵyrý» jarnamasyna nemquraılyǵy úshin sóz estidi
Atalǵan másele boıynsha sáýlet jáne qala qurylysy basqarmasynyń jetekshisi Baqtybaı Taıtalıev baıandama jasady. Al suraq-jaýapqa kóshkende keńes tóraǵasy Sansyzbaı Esilov «Rýxanı jańǵyrýǵa» arnalǵan bir jarnama máselesin kóterdi. «Máselen, burynǵy qarttar úıiniń qabyrǵasynda «Rýxanı jańǵyrý» degen jazýdyń jaryq dıodtary kúıip ketken be, «Rýxanı jan» bolyp qaldy. Sonda «Rýxanı jan» degen kim? Ol Taıtalıev (basqarma basshysy - avt.) emes pe? Sol jarnama eki aptadaı turǵan shyǵar. Jańa jylǵa deıin jartysy kúıip ketti de, áli tur. Eshkim qarap jatqan joq. Jaraıdy, boran boldy, keıbir jarnamalar synyp qaldy. Ony túsinýge bolady. Alaıda jańaǵydaı nárseler elimizdiń saıası ómirine nemquraılyq tanytýmen birdeı. Baıqap júrińizder!», - dedi S.Esilov.
Budan bólek, keńes músheleri syrtqy jarnamalardyń qatelerin de eske saldy. B.Taıtalıevtiń aıtýynsha, grammatıkalyq qatelerge til basqarmasy jaýapty. Al sáýlet jáne qala qurylysy basqarmasy jarnamalardy ornalastyrý sharalaryn baqylaıdy. «Sizderdiń aıtqandaryńyz durys, qalada qateler kezedesedi. Orynsyz jazýlar da bar. Biraq bizdiń mindetterimiz solaı jazylǵan. Máselen, biz syrtqy kórinisi, orny men estetıkalyq sáıkestigine jaýap beremiz. Al mátinge zań boıynsha til basqarmasy jaýapty. Biz de kóremiz, baıqaımyz. Birden solarǵa jiberemiz», - dep atap kórsetti B.Taıtalıev.
Al «Rýxanı jańǵyrý» sııaqty jarnamalarǵa aýdandyq ákimdikter jaýapty. Degenmen, keńes músheleri osy saladaǵy jumysty bir-birine siltemeı, birlesip atqarýǵa keńes berdi. Bireýi «kólik jýýdyń» bir árpi istemeı qalyp, «ólik jýý» bolyp ketkenin de eske aldy. Keńes tóraǵasy Sansyzbaı Esilov bolsa, saıası jarnamalardy túzetýdi kópke sozbaý qajettigin jetkizdi. «Dúısenbi kúni men jumysqa bara jatqanda mindetti túrde qaraımyn. Túzetetin bolyńyzdar», - dedi ol.
