Basqarma basshysy 50 myń dollar alamyn dep 2 mln teńgemen ustaldy

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi Jambyl oblysynda jer úshin para alǵan sheneýnikti ustady, dep xabarlaıdy QazAqparat tilshisi.

Agenttiktiń resmı ókili Nurlan Jaxınniń aıtýynsha, kúdikti -  jerdiń paıdalanýy men qorǵalýyn baqylaý boıynsha oblystyq basqarmanyń basshysy.

«Ol sharýa qojalyǵyna tıesili 25 gektar jerdi memleket paıdasyna qaıtarmaǵany úshin 50 myń dollar talap etken. Sonyń 2 mln teńge kólemindegi parasyn aldy degen kúdik bar. Qazirgi ýaqytta atalǵan fakti boıynsha tergeý júrgizilip jatyr», - dedi N.Jaxın Astanada ótken baspasóz máslıxatynda.

Agenttiktiń aqparatyna sáıkes, týra sondaı qylmys Aqmola oblysynda anyqtaldy. Biraq basqarma basshysy óz qylmysyn iske asyryp úlgerdi. Eki jyl buryn ol qyzmettik laýazymyn asyra paıdalanyp, tórt jer telimin memleketke qaıtarmaı, jeke paıdalanýǵa bergen. Sonyń saldarynan bıýdjetke 2 mln teńge kóleminde shyǵyn keldi.