Basqarma basshylary jazalandy: Almaty oblysynyń ákimdigi prokýratýra sheshimimen kelispeıdi
QONAEV. KAZINFORM - Almaty oblysynyń ákimdigi prokýratýranyń memlekettik satyp alý basqarmasynyń basshysy «kásipkerdiń quqyqtaryna nuqsan keltirdi» degen sheshimimen kelispeıtinin málim etti.
Óńir ákimdigi QR ÁQBtK 664-baby boıynsha Memlekettik satyp alý basqarmasynyń basshysyna qatysty ákimshilik is qozǵalýyna jáne 15 mıllıard qarjy týraly jarııalanǵan aqparatqa jaýap retinde bul sheshimge shaǵym túsiretinderin jetkizdi.
«Іsti qozǵaý týraly sheshim Almaty oblysy Qarasaı aýdanynyń Aqyn Sara kóshesi boıynda jol salýǵa konkýrstar ótkizýge baılanysty týyndaǵan. Bul boıynsha atalǵan basqarma tek memlekettik satyp alý týraly zańnama sheńberinde, sondaı-aq sottyń osy jyldyń naýryz jáne sáýir aıyndaǵy sheshimderi men uıǵarymdary negizinde áreket etti. Memlekettik satyp alý basqarmasy prokýratýranyń sheshimimen kelispeıtinin jáne oǵan zańda belgilengen tártippen shaǵymdanady», - dep atap ótti oblystyq ákimdikten.
Osyǵan deıin prokýratýra Almaty oblysy ákimdigine qarasty eki basqarmanyń basshysy kásipkerlik qyzmetke zańsyz aralasqany úshin ákimshilik jaýapqa tartylǵany týraly aıtqan bolatyn.
