Basqa jaqqa qonys aýdarǵandardyń zeınetke shyǵý quqyǵyn shekteý qanshalyqty zańdy
ASTANA. KAZINFORM – Konstıtýtsııalyq Sot Qazaqstannan tysqary elge qonys aýdarǵan azamattardyń zeınetke shyǵý quqyǵyn shekteýdiń Konstıtýtsııaǵa sáıkestigin tekseredi.
Konstıtýtsııalyq Sot taratqan málimetke sensek, Shyǵys Qazaqstan oblystyq sotynyń ákimshilik ister jónindegi sot alqasynyń Áleýmettik kodekstiń 196-baby 1-tarmaǵynyń, 202-baby 2-tarmaǵynyń, 204-baby 3-tarmaǵy 2) tarmaqshasynyń jáne Memlekettik bazalyq zeınetaqy tóleminiń, jasyna baılanysty zeınetaqy tólemderiniń mólsherin esepteý (aıqyndaý), olardy taǵaıyndaý, júzege asyrý, toqtata turý, qaıta esepteý, qaıta bastaý, toqtatý jáne taǵaıyndaý (taǵaıyndaýdan bas tartý) týraly sheshimdi qaıta qaraý qaǵıdalarynyń (QR Premer-Mınıstriniń orynbasary — Eńbek jáne halyqty áleýmettik qorǵaý mınıstriniń 2023 jylǵy 22 maýsymdaǵy № 232 buıryǵy) 5-tarmaǵy besinshi bóliginiń Konstıtýtsııaǵa sáıkestigin qaraý týraly ótinishin konstıtýtsııalyq is júrgizýge qabyldaǵan.
— Ótinish berýshi Kodekstiń jáne Qaǵıdalardyń daýlanyp otyrǵan erejeleri Qazaqstan Respýblıkasynan tysqary jerlerge turaqty turýǵa ketken azamattardyń zeınetaqy quqyǵyn Qazaqstan Respýblıkasynda turaqty turatyn azamattardyń quqyqtarymen salystyrǵanda kemsitedi dep esepteıdi, óıtkeni azamattardyń eki sanaty da eńbek qyzmetin júzege asyra otyryp jáne salyqtardy tóleı otyryp, memleket pen qoǵam aldyndaǵy óz mindettemelerin oryndady, — delingen habarlamada.
Tekserý barysy men nátıjeleri týraly aqparat Konstıtýtsııalyq Sottyń resmı saıtynda jáne Telegram-arnasynda jarııalanatyny habarlandy.
Eske sala keteıik, buǵan deıin Úkimet Konstıtýtsııalyq Sot sheshimderiniń oryndalýyn baqylaýdy kúsheıtkenin jazǵan edik.