Basqa tańdaý joq: ne tıimdi tsıfrlyq ekonomıka quramyz, ne órkenıet kóshiniń sońynda qalamyz — Prezıdent
ASTANA. KAZINFORM — Qasym-Jomart Toqaev ekonomıkany tsıfrlandyrý tıimdiligin arttyrý úshin ólshemdi kórsetkishter qajet ekenin eske saldy, dep habarlaıdy Aqordanyń baspasóz qyzmeti.
Onyń sózinshe, esepsiz nemese kózge kórinbeıtin dúnıeni basqarý qıyn. Sondyqtan Úkimet kóp sozbaı, vedomstvolar deńgeıindegi jaǵdaıǵa bazalyq esep júrgizetin júıeni qoldanysqa engizgeni jón.
— Buǵan salǵyrt qaraýǵa bolmaıdy, jumysty keshiktirmeý kerek. Tsıfrlandyrý men memlekettik jobalardyń paıdasyn jan-jaqty zerdeleý qajet. Úkimet Digital Qazaqstan strategııasy aıasynda «izashar jobalardy» iriktep shyǵardy. Olardy muqııat saraptap, ekonomıkaǵa tikeleı áserin anyqtaý kerek. Jalpy, qaı salada bolsyn, túpki nátıjege jetý úshin árkim jeke jaýapkershilikten qashpaýy qajet. Bizde basqa tańdaý joq: ne tıimdi tsıfrlyq ekonomıka quramyz, ne órkenıet kóshiniń sońynda qalamyz. Basqasha aıtqanda, «ne bolamyz, ne bordaı tozamyz», — dedi Prezıdent.
Memleket basshysynyń aıtýynsha, zııatkerlik kapıtaldy kúsheıtip, eńbek ónimdiligin arttyrmasa, tek demografııalyq ósim básekege qabiletti el bolýǵa kepildik bermeıdi.
— Keńestiń osyǵan deıingi otyrysynda qabyldanǵan sheshimge saı bıyl Ortalyq Azııadaǵy alǵashqy Jasandy ıntellekt ýnıversıteti ashylady. Sheteldik joǵary oqý oryndarymen seriktestik qurý arqyly irgeli jáne qoldanbaly ǵylymdy damytýdy qolǵa aldyq. Birneshe jobanyń tizimi jasaldy. Olar barynsha jedel taratylýǵa tıis. Úkimet qysqa merzim ishinde «ǵylymnan naryqqa deıingi» kezeńderdi túgel qamtıtyn tizbek jasaýy kerek. Aldymyzda qoldanbaly ázirlemelerdi tez arada kommertsııalandyrý, salyqtyq yntalandyrý jáne kelesheginen kóp úmit kúttiretin jobalardy birlese qarjylandyrý quraldary qarastyrylǵan tolyqqandy venchýrlyq ekojúıe qalyptastyrý mindeti tur. Mundaı pármendi tetik bolmasa, ǵylymı áleýetimiz tek akademııalyq ortamen shektelip qalady, — dedi Memleket basshysy.
Budan buryn Prezıdent jasandy ıntellekt salasyndaǵy negizgi memlekettik jobalarǵa toqtaldy.
