Basqa sýretshiler jylqyǵa adamdy mingizip sýrettese, men jylqyny adam deńgeıine kóterdim - sýretshi J.Kákenuly
ASTANA. QazAqparat - Basqa sýretshiler jylqyǵa adamdy mingizip sýrettese, men jylqyny adam deńgeıine kóterdim. Bul týraly búgin QR Tuńǵysh Prezıdentiniń murajaıynda ashylǵan «Sáıgúlik semantıkasy-4» atty jeke kórmesinde QR Sýretshiler odaǵynyń múshesi, pýblıtsıst Jeńis Kákenuly aıtty.
«Sáıgúlik semantıkasy degen taqyryp meniń shyǵarmashylyǵymda osydan 4-5 jyl buryn bastalǵan edi. Sodan beri bul maǵan tynym taptyrmaı, óziniń nátıjesin berip kele jatqan taqyryp», - deıdi qylqalamdy serik etken shyǵarmashylyq ıesi.
Onyń aıtýynsha, jylqy - qazaq halqyn sonaý baǵzy zamandardan kúni keshegi XIX ǵasyrǵa deıin órkenıetke qaraı bastaǵan janýar. «Al endi rýhanı qundylyqtar saıabyrlaǵan myna ǵasyrda da bizdi alǵa jeteleıtin osy jylqy bolady dep oılaımyn. Basqa sýretshiler jylqyǵa adamdy mingizip sýrettese, men jylqyny adam deńgeıine kóterdim. Jylqy arqyly men qazaq halqynyń qýanysh-qaıǵysyn, tarıhı bolmysyn kórsetýge tyrystym», - deıdi ol.
Kórme murajaıdyń áriptestik jobasy boıynsha uıymdastyrylyp otyr. Oǵan qylqalam sheberiniń 50-den astam týyndysy qoıylǵan.
