Basqa sport túrlerin túletetin bıznes MMA-ǵa da kúsh salsa deımiz - Aıdar Mahmetov
ASTANA. QazAqparat - QR MMA, pankratıon jáne greplıng ulttyq federatsııasynyń qurmetti prezıdenti, MMA jáne karateden álem chempıony Aıdar Mahmetov aralas jekpe-jektiń Qazaqstandaǵy damýy men keıbir máseleleri týrasynda oıymen bólisti, dep habarlaıdy «QazAqparat» HAA tilshisi.
«Astanada MMA-dan ótetin chempıonat týraly «Euronews» telearnasynda arnaıy sıýjet shyǵady. Bul degenińiz qazaqstandyq sporttyń ǵana emes, MMA-nyń halyqaralyq dárejede abyroıy artyp kele jatqanyn kórsetedi. AQSh-taǵy reıtıngter de kásibı MMA-nyń álemdik tanymaldyqqa ıe bolǵanyn dáleldeıdi. Bir ǵana Meıvezer men Makgregordyń aıqasyn mysalǵa ala berińiz. Bizde de bul turǵyda úlken áleýet bar», - deıdi Aıdar Mahmetov.
Federatsııanyń qurmetti prezıdentiniń aıtýynsha, Reseıdegi bir ǵana Sheshenstanda «Ahmad» jáne «Berkýt» degen eki iri promoýshen bar. Olarǵa aıtarlyqtaı qarjy quıylyp jatyr.
«Biz bárimiz bilemiz, aqshasy barlar fýtbolǵa nemese ózgede sportqa aqshany kóptep quıady. Iá, munyń bári jaqsy. Biraq, álemge myqtylyǵymyzdy dáleldeı alatyn ózimiz beıim sporttyń túrleri bar. MMA - sonyń biri. Qazir bul sport entýazısterdiń arqasynda ǵana alǵa basyp keledi. Bárimiz aqshamyzdy aıamaı salyp jatyrmyz. Men máselen keıde óz qaltamnan sportshylardyń aılyqtaryn tólep beremin. Shtabtyń da, federatsııanyń da júgi kóp jaǵdaıda ózimizge túsedi. Jekpe-jektegiler shaǵymdanbaıdy. Olardyń ómirleri qarapaıym, sonymen birge sońǵy áli qalǵansha berilmeıdi. Atalǵan chempıonat qazaqstandyq sportshylardy jańa qyrynan kórsete biler degen úmittemin. Basqa sportqa ketip jatqan bıznes MAA-ǵa nazaryn aýdarar dep senemin. Óıtkeni, Qazaqstanǵa da úlken ári aýqymdy, qarjylandyrylýy bar promoýshen kerek», - dep túıdi Aıdar Mahmetov.
Eske sala ketsek, 6-7 qazan kúnderi Astanada Búkilálemdik MMA qaýymdastyǵynyń nusqasy boıynsha MMA-dan V álem chempıonaty ótedi. Aıtýly dodaǵa qazaqstandyq MMA sheberlerimen birge, Qytaı, AQSh, Reseı, Marokko, Lıvan eldernen 150-den asa sportshy ózara baq synaspaq.
