Basqa mamandyqtan pedagogıkalyq baǵytqa aýysý úshin UBT-dan qansha ball jınaý kerek

ASTANA. KAZINFORM — Basqa mamandyqta oqyp júrgen stýdentter pedagogıkalyq bilim berý baǵdarlamasyna aqyly negizde aýysý úshin Ulttyq biryńǵaı testileýden (UBT) ótýi kerek. Testileý qańtar jáne tamyz aılarynda ótkiziledi. Bul týraly Ulttyq testileý ortalyǵy túsindirdi.

ýnıversıtet
Foto: Aleksandr Pavskıı / Kazinform

UBT-ǵa qalaı tirkelýge bolady?

Ótinish berý úshin app.testcenter.kz saıtyna kirip, «Pedagogıkalyq ǵylymdar bilim berý salasy boıynsha BBBT-na aýysatyn stýdentter» sanatyn tańdaý qajet.

Testileý bes pánnen turady:

  • úsh mindetti pán;

  • eki beıindik pán.

UBT talaptary qandaı?

Pedagogıkalyq mamandyqqa aýysýdy josparlaǵan stýdentter úshin testileýdiń negizgi talaptary:

  • Shekti ball – 75;

  • Testileý ýaqyty – 240 mınýt;

  • Qatysý quny – 5 640 teńge;

  • Ótkizý kezeńderi – qańtar jáne tamyz.

Stýdentter neni eskerýi kerek?

— Testileý kúnderiniń sany shekteýli. Sondyqtan UBT-ǵa ótinish bermes buryn aýysý talaptaryn, tańdaǵan bilim berý baǵdarlamasynyń sáıkestigin jáne qabyldaý sharttaryn joǵary oqý ornynan aldyn ala naqtylap alǵan jón, — dep eskertti ortalyq mamandary.

Bul talaptardy eskerý stýdentke testileý kezeńin durys tańdaýǵa jáne aýysý rásimine ýaqytynda daıyndalýǵa múmkindik beredi.

Buǵan deıin qandastarǵa grantqa túsý úshin UBT-dan shekti ball jınaý mindetti emes ekenin jazdyq.