Basqa elderge úlgi — DDSU Qazaqstanda jastarǵa energetık satýǵa tyıym salý týraly
ASTANA. KAZINFORM — Qazaqstan 21 jasqa tolmaǵan adamdarǵa energetıkalyq sýsyndardy satýǵa tyıym salyp, olardyń densaýlyǵyn qorǵaý úshin batyl qadam jasady. Bul týraly Dúnıejúzilik densaýlyq saqtaý uıymy (DDSU) málim etti.
2025 jyldyń qańtarynda kúshine engen jańa zań balalar men jasóspirimder arasynda qant qosylǵan sýsyndardy tutynýdy azaıtýǵa baǵyttalǵan.
Uıymnyń baspasóz qyzmeti atap ótkendeı, bul olardy bolashaqta semizdik, qant dıabeti, júrek-qantamyr aýrýlary, sondaı-aq stomatologııalyq aýrýlar sııaqty kóptegen juqpaly emes dertten saqtaıdy.
— Jańa zań — DDSU usynystaryna sáıkes jastar arasynda qant tutynýdy azaıtýǵa jáne halyqtyń densaýlyǵyn qorǵaýǵa baǵyttalǵan kópten kútken qadam. Energetıkalyq sýsyndarǵa qoljetimdilikti shekteı otyryp, Qazaqstan densaýlyqty birden birneshe deńgeıde jaqsartady. Eń áýeli uzaq merzimdi asqynýlarmen baılanysty balalar men jasóspirimder semizdigimen kúresedi. Sonymen qatar juqpaly emes aýrýlardyń, atap aıtqanda qant dıabetinen júrek-qantamyr aýrýlaryna deıingi dertterine shaldyǵý qaterin tómendetedi, — dep atap ótti DDSU-nyń Qazaqstandaǵy ókili dáriger Skender Syla.
DDSU/Eýropa tamaqtaný, dene belsendiligi jáne semizdik máseleleri jónindegi óńirlik keńesshisi dáriger Kremlın Vıkramasınghe Qazaqstannyń energetıkalyq sýsyndardyń zııandylyǵymen kúreste qolǵa alǵan sheshýshi sharalary basqa elder úshin úlgi bolatynyn atap ótti.
— Qazaqstannyń qoǵamdyq densaýlyq saqtaýda energetıkalyq sýsyndar men quramynda qanty bar sýsyndarǵa qatysty máselesin sheshýge degen umtylysy — DDSU Eýropalyq aımaǵynyń basqa elderi úshin úlgi. Qazaqstan berik saıası erik-jigerdiń, saıasatty naqty derekter negizinde ázirleýdiń jáne halyqaralyq uıymdarmen yntymaqtastyǵynyń arqasynda densaýlyq saqtaý salasynda aıtarlyqtaı progreske qol jetkizýge bolatynyn kórsetti, — dedi ol.
DDSU atap ótkendeı, Qazaqstan osyndaı batyl is-áreketke kóshe otyryp, qoǵamdyq densaýlyq kommertsııalyq múddelerden mańyzdyraq ekenin aıǵaqtap otyr. Sondaı-aq jan-jaqty oılastyrylǵan saıasaty men birlesken kúsh-jigeriniń arqasynda deni saý bolashaqqa ábden qol jetkizýge bolatynyn anyq kórsetedi.
Eske sala keteıik, Májilis jastarǵa energetıkalyq sýsyndar satýǵa tyıym salý týraly zańdy byltyr qabyldady.
Budan bólek, jasóspirim apparattan energetıkalyq sýsyn satyp alsa, jaýapkershilik kimge júkteletini anyqtaldy.
Sondaı-aq, dáriger energetıkalyq sýsynǵa táýeldilikten qalaı qutylýǵa bolatynyn aıtyp berdi.