Basqa elderden kelgen etnıkalyq qazaqtarǵa 55 «Ata joly» kartasy berildi
ASTANA. KAZINFORM – Bıznes-ımmıgranttar jáne suranysqa ıe mamandar sanalatyn basqa eldiń azamattaryna – etnıkalyq qazaqtarǵa Qazaqstanda 10 jyl ómir súrýge jáne jumys isteýge quqyq beretin 55 «Ata joly» kartasy tabystaldy.
Jergilikti atqarýshy organdarǵa «Ata joly» kartasyn alýǵa barlyǵy 75 ótinim tústi. 2023 jyly 44 karta: bıznes-ımmıgranttarǵa 20 karta jáne suranysqa ıe mamandarǵa 24 karta berildi. Bıyl 11 karta berildi: bıznesmenderge 5 jáne suranysqa ıe mamandarǵa 6 karta.
Atalǵan kartany alǵandardyń arasynda ınjener-fızık, ınjener-matematık, hımııalyq tehnologtar, jaq-bet hırýrgııasy dárigerleri, pedıatrlar jáne t. b mamandar bar. Olar 15 elden keldi: Reseı, Qytaı, Aýǵanstan, Mońǵolııa, AQSh, Aýstrııa, Izraıl, Germanııa, Túrkııa, Ózbekstan, Qyrǵyzstan, Nıderland, Fınlıandııa, Frantsııa jáne Túrikmenstan.
«Ata joly» kartasyn engizýdiń maqsaty – tarıhı otanmen baılanysty nyǵaıtý, ulttyq dástúrlerdi saqtaý, Qazaqstanda olardyń áleýetin iske asyrý úshin elge kásipqoılar men tabysty bıznesmenderdi tartý. Bul shetelde turatyn etnıkalyq qazaqtarǵa azamattyǵyn saqtaı otyryp beriledi.
Karta ıegerleri elge kirgen kezde 10 jyl merzimge turýǵa ruqsat alady jáne eńbek qyzmetin júzege asyrý nemese bıznes júrgizý úshin qonystaný óńirin derbes tańdaıdy.
«Ata joly» kartasy bar etnıkalyq qazaq basqa eldiń azamaty bola otyryp, Qazaqstan azamattarymen jáne qandastarmen teń quqyqtarǵa ıe bolady, bul onyń qandastan basty erekshelegi.
Karta ıegerleri (jáne olardyń otbasy músheleri) mynadaı quqyqtarǵa ıe:
– medıtsınalyq kómektiń kepildik berilgen kólemi sheńberinde medıtsınalyq mekemelerde áleýmettik tólemder alý jáne qyzmet kórsetý;
– QR Eńbek kodeksine jáne «Halyqtyń kóshi-qony týraly» QR Zańyna sáıkes Qazaqstan aýmaǵynda jumysqa ornalasý;
– QR Kásipkerlik kodeksine jáne ózge de quqyqtyq aktilerine sáıkes Qazaqstan aýmaǵynda kásipkerlik qyzmetti júzege asyrý;
– «Bilim týraly» QR zańyna sáıkes memlekettik bilim berý uıymdarynda tegin orta bilim alý, memlekettik orta arnaýly jáne/nemese joǵary oqý oryndarynda konkýrstyq negizde tegin orta arnaýly jáne/nemese joǵary bilim alý, jeke oqý oryndarynda aqyly bilim alý;
– «Advokattyq qyzmet jáne zań kómegi týraly» QR zańyna sáıkes memleket kepildik bergen zań kómegin alý;
– azamattyq salasyndaǵy halyqaralyq sharttarǵa jáne QR zańnamalyq quqyqtyq aktilerine sáıkes jeńildetilgen tártippen Qazaqstan Respýblıkasynyń azamattyǵyn alý.
«Ata joly» kartasy bar adamdardyń saılaýǵa jáne QR Parlamenti men máslıhattaryna saılanýǵa, respýblıkalyq referendýmǵa qatysýǵa quqyǵy joq jáne memlekettik qyzmetke kire almaıdy.
Eger «Ata joly» kartasynyń ıesi Qazaqstan azamattyǵyn alsa, karta jaramsyz dep tanylady.
Esterińizge sala keteıik, Memleket basshysynyń tapsyrmasy boıynsha 2023 jyldyń shildesinen bastap shetelde turatyn etnıkalyq qazaqtar úshin elge jeńil kirý/shyǵý máselesi pysyqtalǵan «Ata joly» kartasy engizildi.
