Basqa aýylǵa jumysqa ketken: ShQO-da joǵalǵan jasóspirim tabyldy
ÓSKEMEN. QazAqparat – Shyǵys Qazaqstan oblysy Tarbaǵataı aýdanynda polıtsııa qyzmetkerleri joǵalǵan balany tapty, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, Tarbaǵataı aýdany Aqsýat aýylynyń turǵyny tártip saqshylaryna habarlasyp, 2007 jylǵy ulynyń joǵalyp ketkendigin aıtty.
«Polıtseıler birden jedel izdestirý sharalaryna kiristi. Sonyń nátıjesinde jasóspirim Qumkól aýyldyq okrýgine qarasty Shuńqyroba eldi mekeninen tabyldy. Kámelettik jasqa tolmaǵandar isteri jónindegi ýchaskelik polıtsııa ınspektorlary barǵan ýaqytta sol jerde Aqsýat aýylynda turatyn basqa da kámelettik jasqa tolmaǵan balalar júrgen», - delingen habarlamada.
Tekserý barysynda belgili bolǵandaı, Qumkól aýylynyń turǵyny zańsyz túrde balalardy egistikke qarbyz egýge jumysqa shaqyrǵan. Barlyq jasóspirimder Aqsýat aýylyna jetkizilip, zańdy ókilderiniń qatysýymen medıtsınalyq tekserýden ótti.
«Balalarynyń tárbıesine, qaýipsizdigine nemquraılyqpen qaraǵandary úshin ata-analarǵa qatysty jınaqtalǵan materıaldar aýdandyq balalardyń quqyǵyn qorǵaý komıssııasyna joldanǵan. Komıssııa músheleriniń sheshimimen olarǵa eskertý jasaldy. Sondaı-aq atalǵan fakti boıynsha ShQO memlekettik eńbek ınspektsııasy basqarmasy jasóspirimderdi jumysqa shaqyrǵan er adamdy QR ÁQBtK-niń 86-baby 3-tarmaǵy boıynsha ákimshilik jaýapqa tartty», - delingen vedomstvo aqparatynda.
