«Basymnan atty, buǵyp qaldym»: Rýslan Berdenov sotta ne aıtty

ShYMKENT. KAZINFORM – Shymkent qalasy ákiminiń orynbasary Rýslan Berdenovke jasalǵan qastandyq isi boıynsha sot tyńdalymy jalǵasyp jatyr. Búgingi otyrysqa jábirlenýshi onlaın rejımde qatysyp, oqıǵanyń qalaı bolǵanyn baıandady.  

Berdenovtiń aıtýynsha, shabýyl jasaýshy oǵan týra basynan oq atýqan.

– Alǵashqy oq týra basyma baǵyttaldy. Buǵyp úlgerdim. Artymnan tórt ret oq atyldy. Jerge quladym. Qasyma kelip, taǵy da myltyǵyn oqtap jatty. Qansyrap jattym, biraq ornymnan turmasam, óletinimdi bildim. Bir qolym istemeı qaldy. Sóıtip ornymnan turyp, Jıembaımen alystym. Sol kezde qarýdyń jerge qulaǵanyn estidim. Jıembaı qashýǵa daıyndalyp jatqanda, júrgizýshim Meırambek oǵan tosqaýyl bolyp, kólikpen jáı kelip qaqty. Turda da qashty. Odan keıin men quladym, – dedi ol.

Ákim orynbasarynyń sózinshe, dál osy sátte janynda bolǵan eki qyz alǵashqy medıtsınalyq kómek kórsetken.

– Olardyń bireýi medbıke eken. «Uıyqtamańyz, kózińizdi jumbańyz» dep demep otyrdy. Solar maǵan alǵagshqy kómek berdi. Sol sátte oń ókpemniń istemeı qalǵanyn sezdim. Aýa jetpeı jatty. Tynys ala almaı, aýzyma qannyń dámi kelgende ómirimniń sońǵy sáti jetkendeı oıladym. Ota kezinde ókpemniń 20 paıyzy alynyp tastaldy. Baýyrymdy shashyp, qaıta jınady, – dep atap ótti Berdenov.

Sondaı-aq, ol qastandyq jasaǵan adamnyń Ernar Jıembaı ekenin keıin ǵana tanyǵanyn aıtty.

– Alǵashynda kim ekenin baıqamadym. Bireý júgirip keldi. Qolyndaǵy qarýdy kórdim. Týra basqa atty. Otyryp úlgerdim. Qarańǵyǵa qaraı umtyldym. Keıin art jaǵymnan tórt ret oq atty, – dedi jábirlenýshi.

Sot protsesi áli de jalǵasyp jatyr.

Aıta keteıik, budan buryn Rýslan Berdenovke jasalǵan qastandyq týraly is sotqa joldanǵanyn jazǵan bolatynbyz.

21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi.

Rýslan Berdenov aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan.