«Basymdyqty paıdalana almaǵanymyz ókinishti»: «Qaırat» bapkeri «Pafosqa» qarsy match jaıly pikir bildirdi

ALMATY. KAZINFORM – Almatylyq «Qaırat» klýbynyń bas jattyqtyrýshysy Rafael Ýrazbahtın Chempıondar lıgasynyń toptyq kezeńi aıasynda ótken «Pafosqa» qarsy teń aıaqtalǵan matchqa qatysty pikir bildirdi, dep habarlaıdy Kazinform agenttigi.

Matchtan keıingi baspasóz máslıhatynda Ýrazbahtın jankúıerlerge qoldaý bildirgenderi úshin alǵys bildirip, oıyn basynda alǵan artyqshylyqty komanda iske asyra almaǵanyn moıyndady.

— Árıne, kóńilimiz tústi, biraq qarsylasqa da qurmet kórsetý kerek. «Pafos» osy týrnırde biraz tájirıbe jınap úlgerdi. Olar «Olımpıakospen» teń oınady. Búgingi kezdesýdiń basym bóliginde olar bir oıynshyǵa kem oınady. Soǵan qaramastan birneshe qaýipti sát uıymdastyra aldy aldy. Bizge keı sátterde sáttilik serik boldy, bul rette Temirlan Anarbekovtiń úlesi zor. Oǵan oıyny úshin alǵys aıtamyn. Iá, biz óz múmkindigimizdi paıdalana almadyq, biraq, bálkim, solaı bolýy kerek bolǵan shyǵar. Biz kishigirim qadamdarmen alǵa jyljımyz, alda áli talaı match, jeńister de keledi. Jigitterge jankeshtiligi, oıynǵa degen yqylasy men daıyndyǵy úshin alǵys aıtqym keledi. Sonymen qatar jankúıerlerge de rahmet — stadıon tóńiregindegi áńgimelerge qaramastan, olar kelip, bizge qoldaý kórsetti. Jeńispen qýanta almaǵanymyz úshin sál kóńilimiz tústi, biraq biz bolashaqqa senimmen qaraımyz, — dedi R.Ýrazbahtın.

Sondaı-aq jattyqtyrýshy matchtyń basynan-aq komanda oıynshylar sany jaǵynan artyqshylyqqa ıe bolady dep kútpegenin aıtty. Alaıda bul jaǵdaı olardyń shabýylǵa baǵyttalǵan oıyn stıline áser etpegen. Onyń aıtýynsha, «Qaırattyń» birneshe jaqsy múmkindigi boldy, biraq qarsylas tas qamaldaı toıtarys berip, joǵary deńgeıdegi qorǵanys kórsetti.

Chempıondar lıgasyndaǵy bolashaq múmkindikter jaıly aıta kele, Ýrazbahtın bastysy — komanda óz stılinde, batyldyqpen, jankeshtilikpen jáne minezben oınaýy kerek ekenin atap ótti. Sonda nátıje de kóp kúttirmeıdi. Sondaı-aq ol mundaı deńgeıdegi oıyndarda tájirıbe jınaý komanda úshin óte mańyzdy ekenin jetkizdi.

Aıta ketsek, «Qaırat» óz alańynda Chempıondar lıgasynyń toptyq kezeńi aıasynda «Pafospen» ótken kezdesýde  teń oınady.