Bashmakov «sýper» prezıdenttik bıliktiń ne úshin kerek bolǵanyn túsindirip berdi
ASTANA. QazAqparat - Eks-depýtat Anatolıı Bashmakovtyń aıtýynsha, Prezıdenttiń keıbir ókilettilikterin Úkimetke tapsyryp, Parlamenttiń baqylaýshy fýnktsııalaryn kúsheıtetin kez keldi. Búgin memlekettik qyzmetkerlerge dáris oqyǵan ǵalym áýelde «sýper» prezıdenttik bıliktiń ne úshin kerek bolǵanyn túsindirip berdi, dep habarlaıdy QazAqparat tilshisi.
«Negizi, bizde prezıdenttik bılik qala beredi. Alaıda buǵan deıin ol «sýper» prezıdenttik bılik boldy dep aıtýǵa bolady. Ashyǵyn aıtý kerek, bas kezinde ondaı bılik bizge kerek edi. Áli esimde, Qazaqstan Táýelsizdik alǵanda men Petropavl qalalyq partııa xatshysy qyzmetin atqardym. Soltústik óńir ekenin bárimiz bilemiz. Sol kezde Qazaqstannyń basqarý júıesin tas-talqan etýdi kózdegen ishki kúshter boldy. Separatıstik tolqyndar da qyltıyp shyǵa keldi. Oǵan qosa, ekonomıka quldyrap, xalyq meń-zeń boldy. Mine, dál osy ýaqytta myqty prezıdenttik bılik kerek boldy. Mysaly, Reseıde áli kúnge deıin qala merlleri oblys gýbernatoryna baǵynbaıdy. Sonyń saldarynan bılik tarmaqtary arasynda kelispeýshilikter bar. Jumys júrmeıdi», - deıdi Bashmakov.
Ǵalymnyń aıtýynsha, qazirgi kezde eldiń áleýmettik-ekonomıkalyq jaǵdaıy ózgerdi, xalyqtyń saıası sanasy da ósti. Sondyqtan bılik tarmaqtary arasyndaǵy ókilettilikterdi qaıta bólý sharalary der kezinde qolǵa alynyp otyr. 
«Parlamenttiń baqylaý fýnktsııalary kúsheıedi. Ol - óte durys sheshim. Endi, depýtattar bıýdjet qarajatyn jarty jylda bir ret emes, kúnde baqylaı alady. Kez kelgen ýaqytta mınıstrdi shaqyryp, esep berýdi talap ete alady. Al Úkimettiń jaýapkershiligi artady», - dep atap kórsetti eks-depýtat.
