Bashqurtstandaǵy eń kóne meshitke 275 jyl toldy
ASTANA. 4 sáýir. QazAqparat - Kóne qulshylyq úıi Reseıdegi Bashqurtstan Respýblıkasy Baltachev aýdanyna qarasty Staroıaksheev selosynda ornalasqan.
Meshittiń tarıhy tereńde jatyr - ateıst kommýnısterdiń dáýreni júrip, totalıtarlyq júıeniń qylyshynan qan tamyp turǵan kezde de jabylmaı qalǵan kıeli oryn. Bul týraly muslim.kz saıty jazady.
«Meshit 1738 jyly aǵashtan turǵyzylǵan. Osy aýdannyń ımamy Rafıs Shaıhaıdarovtyń aıtýynsha, meshit qurylysynyń myqtylyǵy sondaı, jaqynda jóndeýden ótkizer kezde munarasyn sol kúıinde qaldyrýdy jón kórgen eken. Bul meshit tek namaz oqylatyn qulshylyq úıi ǵana emes, sonymen birge, kezinde osy aımaqtyń mádenı, aǵartý ortalyǵyna aınalǵan desedi. Tipti, kórshiles oblystardan da at sabyltyp keletinder bolypty. Qazan revolıýtsııasynan keıin bolshevıkter qulshylyq úıin jaýyp tastaýǵa árekettengende jergilikti aqsaqaldar ara túsip, aman alyp qalǵan», - dep jazady Áziret Sultan meshitiniń resmı saıty.
Osylaısha úsh ǵasyrdyń kýásine aınalǵan kóne jádiger áli kúnge eldiń ıgiligine jarap keledi.
