Bashqurtstan teatry pesa qoıdyrý úshin jas qazaq rejısserin shaqyrtyp aldy
ASTANA. QazAqparat - Shyǵys Qazaqstan oblystyq Jastar teatrynyń kórkemdik jetekshisi, rejısser Aıdyn Salbanov Reseıdiń Bashqurtstan eline shaqyrtý aldy. Sahna sheberi Salaýat memlekettik bashqurt drama teatrynda Ilgız Zaınıevtiń «Lıýstra» atty pesasyn qoıatyn boldy, dep habarlaıdy «QazAqparat» HAA tilshisi.
«Teatr ujymy jas ta bolsa eńbegimen tanylǵan qazaqstandyq rejısserdiń bizge keletinin qýanyshpen habarlaıdy. Tanysyp qoıyńyzdar - ol Aıdyn Salbanov. Ol Aleksandr Vampılovtyń (Ýfa qalasy, 2017 j.) 80 jyldyǵyna arnalǵan rejısserlik laboratorııanyń jeńimpazy. Dál sol ónerpazdyń Vampılov týraly qoıylǵan «Proshlym letom v Chýlımske» atty eskızine sarapshylar keńesiniń músheleri men kórermender daýys berip, onyń eńbegin bir aýyzdan úzdik dep tapqan bolatyn», - dep jazylǵan Salaýat memlekettik bashqurt drama teatrynyń Feısbýk paraqshasynda.
Atalmysh laboratorııanyń kýratory, Salaýat memlekettik bashqurt drama teatrynyń bas rejısseri Ilsýr Kazakbaev zor qurmetpen Aıdyn Salbanovty qoıylymǵa qatysýǵa shaqyrǵan.
«Bul joly biz Ilgız Zaınıevtiń «Lıýstra» atty pesasyn tańdap aldyq. Onyń tusaýkeseri 27 aqpanda ótedi. Bul degenińiz jaqyn arada Qazaqstannan kelgen rejısserdiń eńbegin búkil respýblıkanyń teatraldary tamashalaı alady degen sóz», - delingen jazbada.
Aıta ketsek, Aıdyn Abzalbekuly - rejısser, Shyǵys Qazaqstan oblystyq Jastar teatrynyń kórkemdik jetekshisi. Ol Qyrǵyzstandaǵy Bıbisara Beıshenalıeva atyndaǵy mádenıet jáne óner memlekettik ýnıversıtetin teatr rejısseri mamandyǵy boıynsha bitirgen (2010-2013 jj.). 2009 jylǵy Levıs Ýıtlok mýzykalyq qoıylymyndaǵy sheberlik synybynyń qatysýshysy. 2014 jyly Sankt-Peterbýrg qalasynda biliktiligin arttyryp, 2016 jyly Qazan qalasynda ótken «Naýryz» atty IV halyqaralyq forým-festıvaline qatysqan. «Kúndelik», «Oıynshyqtar», «Shoý-bıznes - mahabbat», Tórt qaýyrsyn, báıterek, mystan», «Qara pıma», «Tenderge túsken kelinshek atty eńbekterdiń avtory. Birneshe halyqaralyq jáne respýblıkalyq festıvaldardyń jeńimpazy.
