Bashar Asadtyń týysy adamzatqa qarsy qylmys jasaǵany úshin ólim jazasyna kesildi
ASTANA. KAZINFORM – Sırııa bıligi eldiń burynǵy basshylyǵynyń ókilderi men olarǵa qatysy bar adamdarǵa qatysty sot protsesin jalǵastyryp jatyr, dep habarlaıdy Kazinform agenttiginiń menshikti tilshisi.
Seısenbi kúni Damask soty Sırııanyń burynǵy prezıdenti Bashar Asadtyń týysy Vasım Asadty adamzatqa qarsy qylmys pen áskerı qylmys jasaǵany úshin ólim jazasyna kesti. Bul týraly «Sana» agenttigi habarlady.
Syrian court sentences Wassim al-Assad to death#SANANEWS pic.twitter.com/pb3Sv3Xq4U
— SANA English (@SANAEnOfficial) August 18, 2026
Damaskidegi tórtinshi qylmystyq sot ony qasaqana kisi óltirý, azaptaý, zańsyz bas bostandyǵynan aıyrý jáne basqa da qylmystar jasaǵany úshin kináli dep tanydy. Sondaı-aq sot sottalǵan adamnyń jyljymaly jáne jyljymaıtyn múlkin memleket qazynasyna tárkileý týraly sheshim shyǵardy.
Іs materıaldaryna sáıkes, 2011 jyly Vasım Asad brıgadalyq general Ǵııat Dallamen kelisip, quramynda shamamen 30 adam bolǵan eki qarýly jasaq qurǵan. Olar burynǵy prezıdenttiń aǵasy Maher Asad basqarǵan Sırııa armııasynyń 4-dıvızııasymen baılanysty kúshterdiń quramynda áreket etken.
Bul jasaqtardyń negizgi qyzmeti Shyǵys Ǵýta aımaǵynda shoǵyrlanǵan. Sot olardyń eldi mekenderge shabýyl jasaýǵa, adamdardy urlaýǵa, azaptaýǵa jáne beıbit turǵyndardy óltirýge qatysy bar ekenin anyqtady.
Atap aıtqanda, Vasım Asad pen onyń baqylaýyndaǵy toptar 2013 jyly ál-Mlıha aýdanynda bolǵan oqıǵaǵa qatysy bar dep tanyldy. Sol kezde áýeden jáne artıllerııadan jasalǵan atqylaý saldarynan shamamen 75 beıbit turǵyn qaza tapqan.
Sonymen birge sot Vasım Asadty esirtki saýdasy men kontrabandasyna qatysty aıyptar boıynsha jetkilikti dálel bolmaǵandyqtan aqtady.
Sot protsesi 24 maýsymda bastalyp, úkim altynshy otyrysta shyǵaryldy. Sot sheshimine kassatsııalyq tártippen shaǵym jasaýǵa bolady.
Buǵan deıin, 11 tamyzda, osy sot Sırııanyń burynǵy prezıdenti Bashar Asadty jáne birqatar burynǵy joǵary laýazymdy sırııalyq sheneýnik pen áskerı qyzmetkerlerdi syrttaı ólim jazasyna kesken bolatyn.
