Bashar Asad elden qashqan soń alǵash ret málimdeme jasady
ASTANA. KAZINFORM – Sırııanyń burynǵy prezıdenti elden armııa «sońǵy pozıtsııalaryn berip» jáne «barlyq memlekettik ınstıtýt sal bolyp qalǵanda» ǵana ketkenin aıtty, dep habarlaıdy Euronews.
Bashar Asad elden qashqannan keıin alǵashqy málimdemesin jasady. Ol Damaskide kóterilisshiler astanaǵa kirgen 8 jeltoqsan kúni tańerteńge deıin bolǵanyn jáne sol kúni keshke armııa «sońǵy pozıtsııalaryn joǵaltqanda» jáne «barlyq memlekettik mekemeler sal bolyp qalǵan kezde» elden ketkenin aıtty.
Bul málimdeme burynǵy prezıdenttiń Telegram-kanalynda jarııalandy. Onda onyń Damaskiden reseılik Hmeımım avıabazasy ornalasqan Sırııanyń Latakııa provıntsııasyna barǵany aıtylady. Sonymen birge onyń astanadan ketýi «reseılik odaqtastarmen kelise otyryp jáne áskerı áreketterdi odan ári baqylaý maqsatynda» júzege asyryldy.
Burynǵy prezıdent «Sırııadaǵy oqıǵalar kezinde otstavkaǵa ketý jáne elden qashý múmkindigin bir ret te oılamaǵanyn» aıtady. Al onyń Hmeımım bazasynan evakýatsııalanýyna armııanyń qulaǵany jáne bazanyń ózine ushqyshsyz ushaqtarmen shabýyl jasaı bastaǵany sebep bolǵan kórinedi.
Asad málimdemeni jarııalaýdy qaýipsizdik maqsatynda keıinge qaldyrǵanyn jazdy jáne oqıǵa týraly egjeı-tegjeıli baıandaýǵa ýáde berdi.
Buǵan deıin Sırııanyń burynǵy prezıdenti Bashar Asadtyń Máskeýde ekeni jáne Reseıden baspana alǵany belgili bolǵan.
Buǵan deıin Eýropalyq Odaqtyń Syrtqy ister qyzmeti Sırııadaǵy jaǵdaı boıynsha málimdeme taratqan edi.
Qytaı da Sırııadaǵy jaǵdaıdy muqııat baqylap otyrǵanyn jáne elde turaqtylyqtyń múmkindiginshe tezirek qalpyna kelýine úmittenetinin jetkizdi.
Reseı Syrtqy ister mınıstrligi Bashar Asadtyń bılikti beıbit jolmen tapsyratynyn aıtyp, elden ketkenin atap ótti.
Óz kezeginde Qazaqstannyń Qorǵanys mınıstrligi Golan jotalaryndaǵy bitimgerlerdiń qaýipsizdigi úshin qajetti shara qabyldap jatyr. Qazaqstandyq bitimgerler qyzmet etetin BUU-nyń Golan jotalaryndaǵy (SONNR) jaýapkershilik aımaǵyndaǵy jaǵdaı shıelenisti, biraq turaqty dep baǵalanyp otyr.
Buǵan deıin Kazinform Bashar Asadtyń ómirbaıanyn, Taıaý Shyǵystyń eń kúrdeli jáne qaqtyǵysqa toly elderiniń birin qalaı basqarǵanyn sholyp kórdi.