Basel Summer 2010 týrnırinde «Barys» hokkeıshileri Slovakııanyń «Slovan» klýbynan býllıtter serııasy boıynsha jeńildi
ASTANA. Tamyzdyń 20-sy. QazAqparat - Shveıtsarııada ótip jatqan Basel Summer 2010 hokkeı týrnıriniń ekinshi týrynda Astananyń «Barysy» Slovakııanyń «Slovan» klýbynan býllıtter serııasy boıynsha 3:4 esebimen utylyp qaldy, dep habarlaıdy QazAqparat chempıonat.rý saıtyna silteme jasap.
Keshe, tamyzdyń 19-da ótken kezdesýdiń birinshi kezeńinde-aq Delman jáne Bochenskı eki shaıba aıyrmashylyqpen «Barys» komandasyn alǵa shyǵarǵan bolatyn. Degenmen slovakııalyqtar oıynnyń ortasyna qaraı Kovaıchýk pen Hýısa esepti teńestirip ketti.
Kezdesýdiń 57-shi mınýtynda Starchenko astanalyqtardy taǵy alǵa shyǵardy. Biraq eki mınýttan keıin sol baıaǵy Hýısa gol saldy. Oıynnyń negizgi ýaqyty 3:3 esebimen teń aıaqtaldy.
Býllıtter serııasy barysynda slovakııalyqtardyń joly boldy. «Slovan» komandasynyń hokkeıshisi Vaıts múlt ketpeı, óz klýbynyń paıdasyna jeńis syılady. Oıyndaǵy resmı esep - 3:4.
Tek býllıtter serııasy arqyly jeńilgen «Barys» komandasy týrnırdiń jartylaı fınalyna joldama aldy. Ol 4 upaımen A tobyndaǵy birinshi oryndy ıelenip otyr. Ekinshi orynda «Slovan» (2 upaımen), al sońǵy úshinshi oryndy «Bazel Sharks» (upaısyz) qorytyndylap tur.
Eske sala keteıik, bunyń aldynda ózderiniń alǵashqy oıyndarynda «Barys» hokkeıshileri týrnır ıeleri «Bazel Sharks» komandasyn 8:1 esebimen utqan bolatyn.
