Básekeli ortaǵa 650 mlrd teńge baǵyttadyq – Esimov otandyq óndirýshilerdi qoldaý jaıly

NUR-SULTAN. QazAqparat – «Samuryq-Qazyna» UÁQ» AQ basqarma tóraǵasy Ahmetjan Esimov ózi basshylyq etip otyrǵan qorǵa qarasty kompanııalardyń satyp alý júıesiniń jumysy qalaı rettelgenin aıtyp berdi, dep habarlaıdy QazAqparat tilshisi.

«Turaqty damý boıynsha halyqaralyq ınstıtýttyń málimetine (International Institute for Sustainable Development) sáıkes satyp alý júıesine shaǵyn jáne orta bıznestiń belsendi túrde qatysýy – kez kelgen memleketti ekonomıkalyq jáne áleýmettik jetistikterge bastaıdy. Máselen Ońtústik Koreıanyń satyp alý júıesin jaqsartý tájirıbesin atap ótkimiz keledi. Koreıalyqtar shaǵyn jáne orta bıznes sýbektilerine basymdyq berdi. Ońtústik Koreıada 2003 jyly elektrondy satyp alý júıesindegi bıznestiń qatysýy 55 paıyzdyq deńgeıde edi. 2010 jylǵa bul kórsetkish 75 paıyzǵa jetti. Sonymen qatar ol memleket jyl saıynǵy ákimshilik shyǵyndaryn 8 mlrd AQSh dollarǵa únemdedi», - dedi Ahmetjan Esimov elordada ótip jatqan «Samruk Business Forum» sharasynda.

Qor basshysynyń aıtýynsha, Ekonomıkalyq yntymaqtastyq jáne damý uıymy da shaǵyn jáne orta bıznestiń ekonomıkanyń ósimine, ártaraptandyrylýyna, beriktigine sep bolatynyn málimdegen.

«Mysaly Sıngapýrda ShOB-qa kásiporyndardyń 99 paıyzy tıesili. Olar 2017 jyly jalpy ishki ónimniń 48 paıyzyn, jumyspen qamtýdyń 72 paıyzyn, eksporttyń 78 paıyzyn qamtydy. Germanııadaǵy jalpy ishki ónimniń 54 paıyzyn, jumyspen qamtýdyń 64 paıyzyn, eksporttyń 30 paıyzyn kásiporyndar ıelengen», - dedi ol.

Damyǵan elderdegi kórsetkishterdi keltire otyryp, Ahmetjan Esimov elimizdegi ahýalǵa toqtady. Qor basshysynyń aıtýynsha, bizde de ShOB salasyn damytýdyń tetikteri iske qosylǵan. Dese de damyǵan elderdiń kórsetkishterine qol jetkizý áli de múmkin bolmaı tur.

«Biz aldymen Qor toptaryndaǵy satyp alý júıesin jetildirýdi kózdeımiz. Naqty qandaı jumys atqaryldy? Eń birinshi kezekte biz «Samuryq-Qazynanyń» 2018 jyldyń 1 qańtaryndaǵy satyp alý qurylymyna tereń taldaý júrgizip kórdik. Aqyry satyp alýdyń 90 paıyzdyq úlesi bir jerden júrgizilip otyrǵanyn anyqtadyq. 4,5 myń pozıtsııa – ıaǵnı taýar men jumystyń barlyq túrine qatysty málimetter belgili boldy. Onyń ústine básekeli orta bolmady. Tıisinshe kelisimder bıýdjet aıasynda júrgizilip, qarjyny únemdeý kózdelmedi», - deıdi ol.

«Samuryq-Qazyna» UÁQ» AQ basqarma tóraǵasy 4500 taýar men jumys túri boıynsha pozıtsııa 22 ese – 198-ge deıin azaıǵanyn tilge tıek etti.

«Osylaısha básekeli ortaǵa 650 mlrd teńge berildi. Oǵan 13 myń shaǵyn jáne orta bıznes sýbektisi qol jetkize alady. Kompanııalarymyz bolsa, 40 mlrd teńge únemdedi», - dedi ol.