Básekelestik erejesin buzǵan mıkroqarjy uıymyna shara qoldanyldy
ASTANA. KAZINFORM — Qazaqstan Respýblıkasy Básekelestikti qorǵaý jáne damytý agenttiginiń Astana qalasy boıynsha departamenti «R-Finance» mıkroqarjy uıymy» JShS áreketterinde josyqsyz básekelestik belgilerin anyqtady. Bul týraly agenttiktiń baspasóz qyzmeti málim etti.
— Ótinishter negizinde júrgizilgen tekserý barysynda kompanııa «Biz básekelesterge qaraǵanda 15%-ǵa kóp maquldaımyz» degen mazmunda jarnamalyq SMS-habarlamalar taratqany, alaıda bul aqparattyń shynaıylyǵyn rastamaǵany belgili boldy. Atalǵan jarnama uıaly baılanys abonentteriniń 24 myńnan astamyna joldanǵan, — delingen habarlamada.
Sondaı-aq tekserý barysynda básekeles uıym qyzmetkerlerine klıentterdi «R-Finance» MQU» JShS-na tartqany úshin aqshalaı syıaqy usyný faktileri anyqtaldy, bul básekeleske zalal keltirýi múmkin.
Tekserý nátıjeleri boıynsha Departament kompanııaǵa josyqsyz básekelestik belgileri bar áreketterdi toqtatý qajettigi týraly habarlama joldady.
Qazirgi ýaqytta «R-Finance» mıkroqarjy uıymy» JShS habarlamany oryndady. Kompanııa marketıngtik materıaldarǵa ishki aýdıt júrgizip, jarnamalyq qyzmetke qosymsha baqylaý tetigin engizdi.
Aıta keteıik, buǵan deıin Básekelestikti qorǵaý jáne damytý agenttiginiń Shyǵys Qazaqstan oblysy boıynsha departamenti «Shyǵys Qazaqstan oblysynyń energetıka jáne turǵyn úı-kommýnaldyq sharýashylyq basqarmasy» MM áreketterinde básekelestikke qarsy is-áreketterdi anyqtaǵan edi.
