Básekelestikti qorǵaý agenttiginiń Kedergiler joıý týraly keńesteri Úkimet deńgeıinde qaralady
NUR-SULTAN. QazAqparat - QR Básekelestikti qorǵaý jáne damytý agenttiginiń (BQDA) taýar naryqtaryna kirý kedergilerin anyqtaý jáne joıý jónindegi keńesterinde kóteriletin negizgi taýar naryqtaryndaǵy básekelestikti damytýdyń ózekti máseleleri Qazaqstan Respýblıkasynyń ekonomıkasyn jańǵyrtý jónindegi memlekettik komıssııanyń otyrystarynda qaralady.
Vedomostvonyń málimetinshe, m undaı sheshim Keńester jumysynyń tıimdiligin arttyrý jáne Qazaqstan Respýblıkasynyń Úkimeti qabyldaıtyn sharalardy úılestirý maqsatynda qabyldandy. Birlesken otyrystardy aıyna keminde bir ret ótkizý josparlanyp otyr. Sondaı-aq Memlekettik komıssııada Kedergiler kartasyna engizilgen máselelerdiń oryndalýy týraly esepter qaralyp, kúrdeli máseleler boıynsha sheshimder qabyldanatyn bolady. Birinshi bolyp kezekti Memlekettik komıssııanyń qaraýyna agroónerkásiptik keshendegi memlekettik sýbsıdııalaý kezinde básekelestikti shekteýge qatysty Kedergiler kartasynyń máseleleri jáne olardy joıý jónindegi usynystar shyǵarylatyn bolady.
BQDA Keńesteri Memleket basshysy jarııalaǵan «Halyq únine qulaq asatyn memleket» tujyrymdamasyn iske asyrý sheńberinde kraýdsorsıng qaǵıdattary negizinde quryldy. Keńester elimizdiń 17 óńirinde, respýblıkalyq keńes Nur-Sultan qalasynda quryldy, olardyń árqaısysy bıznes, ekonomıka, óndiris jáne negizgi salalardyń túrli salalarynda jumys isteıtin 12 sarapshydan turady, barlyǵy 216 adam.
Keńesterdiń otyrystaryna básekelestikti damytýdyń negizgi tejeýshi faktorlary jáne taýar naryqtaryna kirýdiń retteýshi tosqaýyldary talqylaýǵa shyǵarylady. Óńirlik keńesterdiń otyrystarynda anyqtalǵan kedergiler BQDA-ǵa jumys úshin beriledi.
Qazirgi kezde Keńester otyrystarynyń qorytyndylary boıynsha taýar naryqtaryna kirý kedergilerin joıý boıynsha 58 usynys qalyptastyryldy, olar naqty merzimderi bar jáne jaýapty oryndaýshylary bar Kedergiler kartasyna engizildi.
