Básekelestikti qorǵaý agenttiginiń call-ortalyǵyna 3 kúnde 1 myńnan astam ótinish tústi
NUR-SULTAN. QazAqparat - 8 -11 qańtar aralyǵynda áleýmettik mańyzy bar azyq-túlik, avtogaz, benzın, dızel otyny, taksı qyzmetteri men agregatorlary baǵasynyń ósýi boıynsha shaǵymdardy qabyldaıtyn qaýyrt jeli arqyly azamattardan 1 060 ótinish kelip tústi, dep habarlaıdy QazAqparat Básekelestikti qorǵaý jáne damytý agenttigine silteme jasap.
Vedomstvonyń málimetinshe, «jedel jelige» kelip túsken barlyq shaǵym zerttelip, olardyń árqaısysy boıynsha ortalyq memlekettik jáne jergilikti atqarýshy organdarmen birlesip tıisti jumystar atqarylyp jatyr. Barlyq qońyraýdyń 70%-dan astamy Almaty qalasynyń turǵyndarynan kelip túsken.
Osy kúnderi shaǵymdardyń basym bóligi azyq-túlik baǵasynyń qymbattaýyna, olardyń sapasyna (merzimi ótken ónimder satylýda), satýshylardyń ádil emestigine ( taýar baǵasy chektegi baǵamen sáıkes kelmeıdi) baılanysty bolyp otyr. Almaty qalasynyń jekelegen aýdandarynyń turǵyndary azyq-túlik taýarlarynyń bolmaýyna shaǵym túsirýde.
Sonymen qatar, gaz ballony, (Nur-Sultan, Ekibastuz, Óskemen, Almaty oblysy, Túrkistan jáne Qaraǵandy oblystary), AI92 markaly benzın (Qaraǵandy, Atyraý, Almaty, Jambyl oblysy), dızel otyny (Nur-Sultan, Pavlodar), taksı qyzmetteri (Nur-sultan, Túrkistan oblysy) baǵalarynyń qymbattaýyna qatysty shaǵymdar kelip tústi.
«Jedel den qoıý úshin shaǵym túsirýshilerdiń barlyǵynan baǵany kótergen saýda obektileriniń, janar-jaǵarmaı quıý stansalarynyń ataýyn jáne mekenjaılaryn, taksı kóliginiń memlekettik nómirin, azyq-túlik ónimi ataýlaryn, sondaı-aq baǵany kótergenderin rastaıtyn kez kelgen aqparatty habarlaýlaryńyzdy suraımyz. Múmkindiginshe chekter, tólem skrınshottaryn, taksı qyzmetin shaqyrý baǵasyn jáne t.b jiberýlerińizdi suraımyz», delingen habarlamada.
