Básekelestikti qorǵaý agenttigi janar-jaǵarmaı salasyndaǵy básekelestik talaptary saqtalmaǵan faktilerdi qarastyrýda - Úkimet basshysy
ASTANA. 15 shilde. QazAqparat /Rýslan Ǵabbasov/ - Básekelestikti qorǵaý agenttigi men quqyq qorǵaý organdary janar-jaǵarmaı salasyndaǵy básekelestik talaptary saqtalmaǵan faktiler boıynsha máseleni qarastyrýda. Bul týraly búgin Zakon.kz aqparattyq portalyndaǵy beıne-onlaın konferentsııa barysynda Premer-Mınıstr Kárim Másimov aıtty.
Básekelestikti qorǵaý agenttigi men quqyq qorǵaý organdaryna janar-jaǵarmaı salasyndaǵy básekelestik talaptary saqtalmaǵan faktiler boıynsha máseleni qarastyrýdy júktegenin aıtqan Úkimet basshysy: «Menińshe, búgingi kúnniń aıaǵyna deıin bul másele sheshiledi»,-dedi.
«Bir jaǵynan alyp qaraǵanda naryqtyq baǵadan tómen satýdy mindetteı almaımyz. Sebebi, bul baǵytta belgili bir naryqtyq ekonomıkanyń zańdylyqtary bar. Atap aıtqanda naryqtan tómen satýdy mindettesek, onda ol kompanııa bankrotqa ushyraýy múmkin. Bul turǵyda balans bolýy kerek»,-dep atap ótti Úkimet basshysy.
K. Másimov óz sózinde 2010 jyldyń egin egý naýqanynan bastap elimizde tómengi oktandy jaǵarmaı boıynsha baǵanyń maýsymdyq aýytqýy bolǵan joq ekendigin aıtty.
Aıta keteıik, 11 shildede bolǵan Úkimet otyrysynan keıingi brıfıngte Munaı jáne gaz mınıstri Saýat Myńbaev Aı - 92, Aı-93 markaly benzınniń shekti baǵasy 102 teńge kóleminde qalatynyn aıtqan bolatyn. Onyń sózine qaraǵanda, jaqyn arada Májilis qabyldaǵan janar-jaǵarmaıdy retteý máselesi jónindegi qabyldanǵan zańǵa qol qoıylǵannan keıin bul másele tez arada sheshilmek. «Aıta keteıik, janar-jaǵarmaıdy retteý máselesi jónindegi zań qabyldanǵan bolatyn. Sol zań boıynsha jaǵarmaıdyń shekti baǵasy anyqtalady. Eger de, sol shekti baǵadan ósetin bolsa, oǵan biz tıisti shara qoldanatyn bolamyz»,-dedi mınıstr. «Aı - 92, 93 markaly benzın úshin shekti baǵa qazirgi kezdegi 102 teńge kóleminde qalatyn bolady. Tek qana "Gelıos" kompanııasy benzın baǵasyn kóterdi. Alaıda bul másele boıynsha tıisti shara qoldanylady»,-dep atap ótti S. Myńbaev.
