Básekelestikti qorǵaý agenttigi turǵyn úı naryǵyndaǵy baǵanyń negizsiz ósýine baılanysty taldaýdy qarashada usynady
ASTANA. 16 qyrkúıek. QazAqparat - Elimizdegi turǵyn úı naryǵynda baǵanyń negizsiz ósýine qatysty taldaý qarasha aıynda usynylady. Bul týraly búgin Parlamenti Májilisinde ótken Úkimet saǵatynda Básekelestikti qorǵaý agenttiginiń tóraǵasy Bolatbek Qýandyqov málimdedi.
«Memleket basshysynyń tapsyrmasyna sáıkes, turǵyn úı baǵasynyń negizsiz ósýine jol bermeý jáne qurylys naryǵynda básekelestikti damytý jónindegi usynystar ázirlenip jatyr. Jalpy, turǵyn úı baǵasynyń kóterilý sebepterine taldaý júrgizilýde. Atalǵan taldaý qorytyndylary qarasha aıyna deıin ázirlenedi dep josparlanýda», - dedi agenttik basshysy.
Onyń aıtýynsha, elimizdegi qurylys naryǵynda kúrdeli máseleler barshylyq. «Biz osy baǵytta jumys istep jatyrmyz. Qurylys materıaldary naryǵyndaǵy baǵaǵa kelsek, onda belgili bir baǵytta turaqtylyq bolǵanymen, jekelegen túrlerinde baǵa «sekirip» turady. Máselen, statıstıka boıynsha kirpish baǵasy 13,9 paıyz, tsement - 8,7 paıyz, temirbeton buıymdary - 8,3 paıyzǵa óskeni baıqalady. Degenmen, qıyrshyq tasqa, metall qubyrlarǵa, jylý ustaǵysh materıaldarǵa baǵa tómendegeni belgilengen. Jalpy, bul naryq baqylaýynda. Biz jaqynda ǵana tsement ónimderiniń naryǵyna saraptama jasadyq. Qazaqstanda 10 tsement zaýyty bolsa, jalpy júkteme jylyna 65-70 paıyzdy quraıdy. Bul da maýsymdyq kezeńmen baılanysty», - deıdi B. Qýandyqov. Bul rette agenttik basshysy keıbir tsement zaýyttarynyń «baıyp qalý» maqsatynda qurylys qarqyn alǵan maýsymda baǵany qoldan kóteretin faktileriniń oryn alatynyn da jasyrmady.
Budan bólek, agenttik TMD elderiniń monopolııaǵa qarsy organdarymen birlesip, áýetasymaldaý, telekommýnıkatsııa qyzmeti, azyq-túlik taýarlary naryqtaryna zertteýler júrgizip jatyr. Sondaı-aq Eýrazııalyq ekonomıkalyq komıssııamen birlesip, elektr energııasy, halyqaralyq áýetasymaldaý, roýmıng qyzmetiniń transshekaralyq naryqtaryna da taldaýlar júrgizilýde. Sonymen birge, TMD elderiniń monopolııaǵa qarsy saıasat jónindegi memleketaralyq keńesiniń jumysy sheńberinde astyq naryǵyna taldaý júrgizý josparlanǵan.
