Básekelestikti qorǵaý agenttigi «Shubarkól kómir» kásipornyna eskertý jasady
Básekelestikti qorǵaý jáne damytý agenttigi buǵan deıin «Shubarkól kómir» AQ «Modern Trading Solutions» Taýar bırjasy» AQ-nyń taýar bırjasyn ózderi óndirgen kommýnaldyq-turmystyq kómirmen saýda-sattyqty uıymdastyrýshy retinde aıqyndaý jóninde sheshim qabyldaǵanyn habarlaǵan bolatyn.
Alaıda «Modern Trading Solutions» Taýar bırjasy» AQ-nyń taýar bırjasynyń áleýetti músheleri úshin shamamen 95 mln teńge mólsherinde birjolǵy kirý jarnasyn belgileýine baılanysty agenttik «Modern Trading Solutions» Taýar bırjasy» AQ-ǵa QR monopolııaǵa qarsy zańnamasyn buzýǵa jol bermeý týraly aldyn ala eskertý jiberdi.
Agenttiktiń aldyn ala eskertýin qaraǵannan keıin birjolǵy jarna mólsheri 20 mln teńgege deıin tómendetildi, alaıda kómir saýdasy sektsııasy boıynsha basqa taýar bırjalarynda kirý jarnasynyń mólsheri 150 myńnan 3,5 mln teńgege deıin ózgeredi.
Bul rette «Modern Trading Solutions» Taýar bırjasy» AQ-nyń buryn qoldanysta bolǵan (2023 jylǵy 23 mamyrǵa deıin) tarıfterine sáıkes rezıdentter/rezıdent emester úshin birjolǵy jarna 500 myń/1 mln teńgeni qurady.
Taýar bırjasy arqyly ótkiziletin kommýnaldyq-turmystyq kómirdi satyp alýshylar, keıinnen kómirdi jeke paıdalaný úshin halyqqa satatyn óńirlik kómir operatorlary bolyp tabylatynyn atap ótý qajet.
Búgingi kúni «Shubarkól kómir» AQ «Modern Trading Solutions» Taýar bırjasy» AQ-men birlesip, 2023 jylǵy qazanda bırjalyq taýardy jetkizýmen kommýnaldyq-turmystyq kómirmen bırjalyq saýda-sattyqty ótkizý kestesi 28 tamyz - 1 qyrkúıek aralyǵynda bekitti.
Osyǵan baılanysty agenttik «Shubarkól kómir» AQ-ǵa Kásipkerlik kodeksiniń talaptary sheńberinde Qazaqstannyń básekelestikti qorǵaý zańnamasyn buzýǵa alyp kelýi múmkin áreketti jasaýǵa jol bermeý jóninde aldyn ala eskertý jiberdi.
