Básekelestikti qorǵaý agenttigi Qazaqstannyń ońtústiginde nan baǵasyn kótergen kásiporyndarmen sottasady

Bul týraly búgin Úkimet otyrysynda atalǵan agenttiktiń basshysy Májıt Esenbaev málim etti.

Qazaqstannyń ońtústiginde nan baǵasynyń negizsiz kóterilýine baılanysty tergeý amaldaryn júrgizgendikterin aıtqan ol «tergeý baǵa ósimi úshin obektıvti negizdiń bolmaǵanyn kórsetti. Nan baǵasynyń kóterilýi óndirýshilermen bir mezgilde ári bir deńgeıde oryn aldy. Tipti olardyń basym bóliginiń burynǵy baǵamen satyp alǵan un qory da bolǵan. Demek bul kelisilgen is-áreket, biz ony anyqtadyq», dedi.

Onyń atap ótýinshe, zań normasyn buzýǵa qatysqan barlyq sýbektiler jazalanatyn bolady. Qazirgi ýaqytta olardyń isi sotqa berilgen.

Básekelestikti qorǵaý agenttigi basshysynyń aıtýyna qaraǵanda, nan baǵasynyń ósýimen qatar unnyń da baǵasynyń negizsiz kóterilgeni anyqtalǵan. Osy is boıynsha agenttik Aqmola, Batys Qazaqstan, Shyǵys Qazaqstan, Ońtústik Qazaqstan, Qostanaı, Mańǵystaý, Pavlodar, Qaraǵandy oblystary naryǵyndaǵy 22 sýbektige qatysty tergeý amaldaryn júrgizgen.

«Bul jumystarǵa keı óńirlerde salyq komıtetiniń, qarjy polıtsııasynyń, prokýratýranyń, aýyl sharýashylyǵy departamentiniń, ákimdikterdiń qyzmetkerleri jumyldyryldy. Antımonopolııalyq zańnamanyń buzylǵandyǵy atalǵan faktilerde naqtylanatyn bolsa agenttik tarapynan kináli tulǵalarǵa qatysty qatań sharalar qabyldanatyn bolady. Biz anyqtaǵan barlyq buzýshylyqtar alypsatarlyq sıpatqa ıe», dedi M.Esenbaev.