Básekelestikti qorǵaý agenttigi baǵany qoldan kóteretinderdi aıamaıdy
ASTANA. QazAqparat - Teńge baǵamyn shetel valıýtasyna túzetýmen baılanysty týyndap otyrǵan jaǵdaı jekelegen naryq sýbektileriniń tıisti taýarlarǵa, onyń ishinde otandyq óndiris taýarlaryna baǵany jasandy kóterýge baǵyttalǵan ártúrli alypsatarlyq is-áreketterge barýyna ákep soqty.
Bul týraly búgin Ortalyq kommýnıkatsııalar qyzmetinde ótken brıfıngte QR Básekelestikti qorǵaý agenttiginiń tóraǵasy Ǵalym Orazbaqov aıtty.
«Birinshiden, josyqsyz kásipkerlerdiń nazaryn mynaǵan aýdarǵym keledi. Básekelestikti qorǵaý agenttigi mundaı kórinisterge «qarsy kúres» júrgizedi jáne olardy taýar naryqtarynan alyp tastaý úshin tıimdi tetikterge ıe. Budan basqa, osy buzýshylyqtar úshin qatań sanktsııalar kózdelgen», - dep atap ótti agenttik tóraǵasy.
Onyń aıtýynsha, áleýmettik mańyzy bar (azyq-túlik, kómir, tsement, kommýnaldyq qyzmetter jáne basqa da) taýar naryǵy sýbektilerine alypsatarlyq baǵanyń ósýine jáne saýda kásiporyndaryna saýda oryndary úshin jalǵa tóleminiń qymbattaýyna jol bermeý týraly hattar jáne monopolııaǵa qarsy zańnamany buzǵany úshin jaýapkershilik týraly eskertý jiberildi.
«Búginde baǵa ósirý derekteri Batys Qazaqstan oblysynda - azyq-túlikke, Qostanaıda - qurylys materıaldaryna, Pavlodar oblysynda dári-dármekke qatysty tirkelgen», - dep atap ótti Ǵ. Orazbaqov.
