Básekelestikti damytýǵa arnalǵan zań jobasy jyl sońyna deıin qabyldanady
ASTANA. 9 qazan. QazAqparat - Búgin QR Parlamenti Májilisinde «Qazaqstan Respýblıkasynyń keıbir zańnamalyq aktilerine básekelestik máseleleri boıynsha ózgerister men tolyqtyrýlar engizý týraly» zań jobasyn talqylaýǵa arnalǵan dóńgelek ústel bolyp ótti.
Sharany Májilistiń Ekonomıkalyq reforma jáne óńirlik damý komıteti uıymdastyrdy.
Atalǵan zań jobasy Qazaqstan jáne Belarýs Respýblıkalary men Reseı Federatsııasy arasyndaǵy Biryńǵaı ekonomıkalyq keńistiktiń normatıvtik-quqyqtyq bazasyn qalyptastyrý sheńberinde Keden odaǵyna qatysýshy elderdiń monopolııaǵa qarsy zańnamasyn úılestirýge baǵyttalady. Budan bólek, qujat Qazaqstannyń qoldanystaǵy monopolııaǵa qarsy ulttyq zańnamasyn odan ári jetildirýdi, naryq sýbektileri úshin ákimshilik kedergilerin qysqartýdy qarastyrady. Básekelestikti shekteıtin normalardy zań aktilerinen alyp tastaý sharalary da kózdeledi.
«Atalǵan zań jobasyn jyl sońyna deıin qabyldaýymyz jáne qujat keler jyldyń basynan bastap jumys isteýi kerek. Toqtala ketetin jaıt, zań jobasymen aınalysatyn jumys toby bul baǵytta óz qyzmetterine kirisip te jatyr. Búgingi kúnge deıin jumys tobyna depýtattar men komıtetterden 169 usynys pen túzetýler kelip túsken eken. Sonyń 135-i jumys tobymen qabyldandy. Depýtattar tarapynan berilgen 56 usynys Úkimetke qorytyndy shyǵarý úshin joldandy», - deıdi komıtet tóraǵasy Seıitsultan Áıimbetov.
Onyń aıtýynsha, zań jobasyn áli de jetildirý túsý qajet etiledi. Jıynnyń maqsaty da sol bolyp otyr.
