Básekelestik agenttigi birneshe tsement zaýytynda tekserýdi aıaqtady

NUR-SULTAN. QazAqparat – Básekelestikti qorǵaý jáne damytý agenttigi birneshe tsement zaýytynda tekserýdi aıaqtady. Májiliste ótken dóńgelek ústelden keıin BAQ ókilderiniń suraǵyna jaýap bergen agenttik tóraǵasy Serik Jumanǵarın osyndaı málimet aıtty, dep habarlaıdy QazAqparat tilshisi.

«Biz qurylys materıaldary boıynsha belsendi jumys istep jatyrmyz. Dál qazir birneshe tekserý júrip jatyr. Mysaly, armatýra – qurylystaǵy mańyzdy matreıaldyń biri. Osy materıaldyń baǵasy boıynsha «ArselorMıttal Temirtaý» kásipornyn tekserip jatyrmyz. Ótken aptada ǵana birneshe tsement zaýytynda tekserýdi aıaqtadyq. Kirpish óndirýshilermen kelisim komıssııasyn ótkizdim. Qazir bul naryq baqylaýda», - dedi Serik Jumanǵarın.

Sondaı-aq, ol baspana baǵasy týraly pikir bildirdi.

«Halyq jınaǵan aqshasynyń bárin baspanaǵa salady. Sondyqtan biz bul máselege monıtorıng júrgizemiz. Baǵa qatty ósedi dep oılamaımyn. Óıtkeni bul halyqtyń tólem qabiletine tikeleı baılanysty», - dedi agenttik basshysy.