Básekege qabiletti shaǵyn jáne orta bıznes úshin arnaıy kelisim engiziledi
ASTANA. KAZINFORM — Bıznestiń básekege qabilettiliginiń sanaty men deńgeıine baılanysty saralanǵan ádisnamalyq baza daıyndalady. Bul týraly Úkimet otyrysynda Premer-Mınıstrdiń orynbasary –Ulttyq ekonomıka mınıstri Nurlan Baıbazarov aıtty.
«Memleket basshysy ekonomıkadaǵy orta bıznestiń úlesin 2029 jylǵa qaraı 15 paıyzǵa deıin ulǵaıtý mindetin qoıdy. Búgingi tańda memlekettik yntalandyrý sharalaryn ózgertý arqyly orta bıznesti damytý úshin jaǵdaı jasaý boıynsha jumystar júrgizilýde. Kásiporyn neǵurlym básekege qabiletti bolsa, soǵurlym ol qoldaý sharalaryn ala alady. Qoldaý sharalary retinde bıznestiń básekege qabilettiliginiń sanaty men deńgeıine baılanysty saralanǵan qajetti ádisnamalyq baza daıyndalady. Damytýǵa arnalǵan quraldardyń biri neǵurlym básekege qabiletti shaǵyn jáne orta bıznes úshin engiziletin arnaıy kelisim bolady, oǵan servıstik qoldaý kórsetiledi jáne qajetti memlekettik qoldaý jıyntyǵy tańdalady», - dedi mınıstr.
Onyń atap ótýinshe, memlekettik qoldaý sharalarynyń Tsıfrlyq tizilimin qalyptastyrý, olardy standarttaý jáne «bir tereze» qaǵıdaty boıynsha usyný boıynsha jumystar qazirdiń ózinde júrgizilip jatyr. Ázirlengen tásilderdiń negizinde «Atameken» Ulttyq kásipkerler palatasynyń kómegimen shaǵyn jáne orta bıznesti damytýdy yntalandyrýǵa, onyń ishinde pakettik sheshimderdi engizýge baǵyttalǵan zańnamaǵa túzetýler qabyldanatyn bolady.
«Sonymen qatar, Ulttyq kásipkerler palatasymen birlesip E-gov Business bazasynda memlekettik qoldaý sharalaryn alý rásimderin avtomattandyrý múmkindigin qarastyratyn Biryńǵaı tereze – kásipkerdiń jeke kabınetin qurý boıynsha jumys júrgizilýde. Baqylaýshy organdardyń bızneske qysymyn tómendetý úshin salalyq zańdarmen bıznesti tekserýdi reglamentteýge tyıym salynady. Atalǵan sharalar ulttyq ekonomıkanyń ósýine yqpal etetin básekege qabiletti shaǵyn jáne qýatty orta bıznesti qalyptastyrýdy qamtamasyz etýge múmkindik beredi», - dedi Nurlan Baıbazarov.
