Bas júlde – páter: Astanada respýblıkalyq báıge ótedi
ASTANA. KAZINFORM — Astana qalasy ákimdiginiń qoldaýymen, Respýblıkalyq báıge federatsııasy, Astana qalasynyń Ulttyq jáne olımpıadalyq at sporty túrleri federatsııasynyń uıymdastyrýymen 7 maýsym kúni qasıetti Qurban aıt merekesi jáne Qazaqstan Respýblıkasynyń Memlekettik rámizder kúnine oraı keń kólemdi respýblıkalyq báıge týrnıri ótedi.
Saryarqanyń saıyn dalasyn dúbirge bólep, eńseli elordanyń tórinde elimizdiń túkpir-túkpirinen jınalǵan tańdaýly tulparlar men saıdyń tasyndaı iriktelgen shabandozdar «Qazanat» atshabarynda baq synamaq. Bul – babalardan mıras bolǵan báıge óneriniń búgingi urpaqqa jalǵasqan jarqyn kórinisi, ulttyq rýhtyń jańǵyryǵy. Jarys barysynda sáıgúlikter birneshe qashyqtyqta synǵa túsedi:
9 shaqyrymdyq «qunan» báıge
• 1 oryn – 3 000 000 teńge;
• 2 oryn – 1 500 000 teńge;
• 3 oryn – 700 000 teńge.
16 shaqyrymdyq «top» báıge
• 1 oryn – «Changan» avtokóligi;
• 2 oryn – 3 000 000 teńge;
• 3 oryn – 1 000 000 teńge.
25 shaqyrymdyq «alaman» báıge
• 1 oryn – 1 bólmeli páter;
• 2 oryn – «Changan» avtokóligi;
• 3 oryn – 2 000 000 teńge;
• 4 oryn – 700 000 teńge;
• 5 oryn – 300 000 teńge.
7 maýsym kúni saǵat 11:00-de ulttyq rýhty asqaqtatatyn dúbirli báıgeniń saltanatty ashylýy ótedi.
Júırik tulparlar men shabandozdardy tirkeý 6 maýsym kúni saǵat 09:00-den 18:00-ge deıin júrgiziledi. Alaman báıgege qatysý jarnasy – 70 myń teńge, top báıgege 50 myń teńge, al qunan báıgege 30 myń teńge belgilendi. Jınalǵan qarajattyń barlyǵy ıgi muratqa, qaıyrymdylyq jolyna jumsalady.
Aıta ketelik júlde qory 19 mln teńge: ulttyq startaptar báıgesiniń jeńimpazdary anyqtalǵan edi.
