Bas jospardaǵy ózgeris: Qyzylorda saıajaılaryna da gaz jetedi
QYZYLORDA. KAZINFORM – Qyzylorda oblysynyń ortalyǵynda turǵyndardy tabıǵı gazben qamtý baǵytyndaǵy jumys jalǵasyn taýyp keledi. Bul týraly qala ákimdiginen habarlady.
Gaz jelisi jetpegen eldi mekenderge jáne qala aýmaǵynda qalyp qoıǵan aýmaqtarǵa kógildir otyn tartý úshin 3 mlrd 500 mln teńge baǵyttaldy.
– Shaharǵa irgeles jatqan Sabalaq eldi mekeni gazǵa qosylyp, turǵyndar ıgiligin kóre bastady. Endigi meje – Qyzylózek aýyldyq okrýgine, ıaǵnı onyń quramyndaǵy úsh aýylǵa gaz qubyryn tartý. Ol úshin 1 mlrd 800 mln teńgege joba ázirlendi. Qazirgi kúni qajet qarajattyń bólinýi úshin jumys atqarylyp jatyr, - delingen habarlamada.
Aldaǵy ýaqytta qalanyń jańa bas jospary bekitilmek. Oǵan qala janyndaǵy saıajaılar túgel enedi. Basty qujat negizinde Edelveıs, Eńbek, Orbıta sekildi saıajaılarǵa da gaz jelisi júrgiziledi.
Buǵan deıin biz Qyzylordada 2 mlrd 659 mln teńgege kent jáne aýyldyq okrýgterdiń 29 kóshesine qaıta jańǵyrtý, ortasha jóndeý jumysy júrgiziletinin jazǵanbyz.