Bas jospardaǵy ózgeris: Almatyda jańa metro jelileriniń jobasy tanystyryldy
ALMATY. KAZINFORM — Almatyda metro jelisin qala syrtyna — Alataý qalasyna qaraı uzartý múmkindigi qarastyrylyp jatyr.
Almatyda qalanyń 2040 jylǵa deıingi Bas josparyna ózgeris engizý boıynsha qoǵamdyq talqylaýlar ótip jatyr. Onda «Almatybasjospar» ǴZI bas dırektory Ashat Sádýov megapolıstiń kólik ınfraqurylymyn damytý jospary týraly aıtyp berdi.
Onyń aıtýynsha, qoldanystaǵy metro jelisi qyzyl túspen belgilengen. Ol «Qalqaman» beketi ashylǵan soń, aldaǵy ýaqytta «Barlyq» bazaryna deıin uzartylady. Sondaı-aq, «qyzyl» jeli ekinshi baǵytta Almaty-1 temirjol vokzalyna deıin jetýi múmkin.
— Qazir biz «qyzyl» jelini «Barlyq» stantsııasyna deıin jetkizýdi jáne ony Almaty-1 temirjol vokzalyna deıin uzartýdy talqylap jatyrmyz, — dedi ol.
Jobada kórsetilgen derekterge sáıkes, «Raıymbek batyr» beketinen Almaty-1 temirjol vokzalyna deıin metronyń uzyndyǵy 7,7 km bolmaq jáne 5 jańa stantsııa salynady.
Jańadan salynatyn metronyń ekinshisi kók túspen belgilengen. Ony aldymen, «Jibek joly» beketinen áýejaıǵa deıin jetkizý josparlanyp otyr. Ashat Sádýovtyń sózinshe, áýejaı ákimshiligi metro beketin tikeleı termınal aldyndaǵy turaqqa ornalastyrýdy usynǵan. Keıin «kók» metro jelisi saqına tárizdes bolyp, qalany aınala salynady.
— Ekinshi kezeń — «Shyǵys qaqpasyndaǵy» kólik habymen baılanystyratyn metronyń «kók» tarmaǵy. Bul habta Qulja jáne Talǵar traktilerinen, Buqtyrma, Úlken Almaty aınalma jolynan, Alataý trassasynan keletin adamdar kelip, osy jerden aýysyp otyrady. Ol polıortalyqtyń negizgi ózegine aınalady, — dep túsindirdi Ashat Sádýov.
Joba boıynsha «Jibek joly» beketi men áýejaı arasyndaǵy metro jelisiniń uzyndyǵy 14 km bolady jáne onyń boıynda 8 beket ornalasady. Al jalpy «kók» metro jelisiniń boıynda 42 beket salynbaq, uzyndyǵy — 76,6 km.
Ashat Sádýov metronyń úshinshi «jasyl» jelisi Alataý qalasynan keletin adamdardy qabyldap, soltústik kólik torabymen baılanysatynyn atap ótti.
— «Jasyl» jelini Soltústik aınalma joly («Baraholka») boıymen «Saıran» stantsııasyna shyǵaramyz, — dedi «Almatybasjospar» basshysy.
Bas josparǵa engizilgen túzetýlerde «Baraholka» bazaryn Alataý qalasyna kóshirý qarastyrylmaǵan. Onyń ornyna qoldanystaǵy saýda ortalyqtaryn jańǵyrtýǵa basymdyq beriledi.
Jobaǵa sáıkes, «jasyl» jeliniń boıynda 17 beket ornalasady jáne uzyndyǵy 28 km-ge jetedi. Odan bólek bir metro jelisinen ekinshisine aýysyp otyratyn 5 stantsııa bolady.
Eske salaıyq, buǵan deıin Almatyda áýejaıǵa deıin ekinshi metro jelisin salý úshin 93 jer telimi alynatynyn jazǵanbyz.
Sondaı-aq Almaty metrosy «Baraholka» arqyly Alataý qalasyna deıin uzarýy múmkin ekeni habarlandy.