Bas jospar bekitildi: Qonaev qalasynda saıajaılar buzyla ma
QONAEV. KAZINFORM – Keıingi ýaqytta Qonaev qalasyndaǵy saıajaı turǵyndary arasynda jańa Bas jospardyń bekitilýine baılanysty «úıler súriledi» jáne «jer ýchaskeleriniń nysanaly maqsaty ózgeredi» degen suraq pen ýaıym kúsheıgen.
Osyǵan baılanysty Qonaev qalasynyń ákimdigi qujat jóninde túsinikteme berip, saıajaı alqaptarynyń aldaǵy damý josparlary týraly málimdeme jasady.
Qonaev qalasynyń Bas jospary Qazaqstan Respýblıkasy Úkimetiniń 2026 jylǵy 10 qyrkúıektegi №800 qaýlysymen bekitildi. Ákimdik málimetine sáıkes, Bas jospardyń bekitilýi jer ýchaskeleriniń nysanaly maqsatynyń avtomatty túrde ózgerýine, menshik quqyǵynyń toqtatylýyna nemese aýmaqty bosatý mindetiniń týyndaýyna ákelmeıdi.
- Búginde «Qapshaǵaı Altyn Alma» kooperatıvi aýmaǵyndaǵy úılerdi buzý kózdelmegen. Jer ýchaskelerin alyp qoıý da josparlanbaǵan. Úılerdi buzýdy, aýmaqty jańartýdy kózdeıtin egjeı-tegjeıli josparlaý jobalary joq. Sondaı-aq atalǵan saıajaı alqabynda qurylys júrgizýdi josparlap otyrǵan naqty ınvestıtsııalyq jobalar men ınvestorlar da joq, - dep túsindirdi Qonaev ákimdiginen.
Sonymen qatar Bas jospar men egjeı-tegjeıli josparlaý jobasy eki túrli qujat ekeni atap ótildi.
Almaty oblysynyń sáýlet jáne qala qurylysy basqarmasy bóliminiń basshysy Rýslan Altybaev qurylys túrleri men ǵımarattardyń qabattylyǵy egjeı-tegjeıli josparlaý jobasyn (EJJ) ázirleý kezinde qarastyrylatynyn habarlady. Ázirge Qonaev qalasy boıynsha EJJ ázirlenbegen jáne bekitilmegen. Onyń aıtýynsha, aýmaqtyń fýnktsıonaldyq aımaqtarǵa bólinýi ózgerissiz saqtalady dep josparlanǵan.
Qala ákimdigi búginde qala shekarasyn naqtylaý jumystaryna daıyndyq júrgizilip jatqanyn málimdedi. Ony jyl sońyna deıin daıyndaý jáne rásimdeý josparlanyp otyr.
- Eń bastysy: búgingi tańda «Qapshaǵaı Altyn Alma» kooperatıvi aýmaǵyndaǵy úılerdi buzý, jer ýchaskelerin alyp qoıý nemese aýmaqty ınvestorlarǵa berý týraly sheshim joq. Bas jospardyń bekitilýi turǵyndar óz jer ýchaskelerin bosatýy tıis degendi bildirmeıdi, - dep naqtylady ákimdikten.
Eske salaıyq, buǵan deıin Qonaevta 1,76 mıllıard teńgelik kazıno satylymǵa shyǵaryldy.