Bas tóreshi – jasandy ıntellekt: Qazaqstanda tsıfrlyq jáne AI-sport federatsııasy quryldy
ASTANA. KAZINFORM – Jasandy ıntellekt sport alańyna da shyqty. Búgin Astanada Tsıfrlyq jáne AI-sport ulttyq federatsııasy tanystyryldy. Jańa uıym vırtýaldy ústel tennısinen týrnırdi bastap ketti. Munda raketka da, arnaıy datchıkter de qajet emes. Oıynshynyń qımylyn planshet kamerasy tirkeıdi. Bas tóreshi – jasandy ıntellekt. Federatsııa prezıdenti Ǵabıt Caltybaev jańa uıymnyń mańyzdy mindetteri týraly aıtyp berdi.
Іs-sharanyń basty oqıǵalarynyń biri – Ulttyq Federatsııanyń AI SPORT platformasynda vırtýaldy ústel tennısinen ótkizgen alǵashqy týrnıri boldy.
AI TABLE TENNIS TOURNAMENT qatysýshylary planshet kamerasynyń aldynda ústel tennısiniń elementteri bar jattyǵýlardy oryndady. Al jasandy ıntellekt olardyń qımyldaryn tanyp, nátıjelerin avtomatty túrde tirkedi. Jarys qorytyndysy boıynsha jeńimpazdarǵa aqshalaı syılyqtar, medaldar men gramotalar tabystaldy.
Federatsııa prezıdenti ári AI SPORT negizin qalaýshy Ǵabıt Saltybaevtyń aıtýynsha, basty ıdeıa dástúrli sporttyń ınfraqurylymǵa táýeldi bolýynan týyndaǵan.
– Oflaın sportqa qatysý úshin sportzalǵa, jattyqtyrýshyǵa nemese aqyly sektsııaǵa barý kerek. Al bizdiń formatta jattyǵýlar men týrnırler telefon arqyly ótedi. Kompıýterlik kórý tehnologııasy kamera arqyly adamnyń qımylyn tirkep, jattyǵýdyń durys oryndalýyn jáne onyń sanyn esepteıdi. Osylaısha qatysýshynyń nátıjesi avtomatty túrde belgilenip, týrnır kestesi boıynsha jeńimpaz anyqtalady, – dedi federatsııa prezıdenti.
AI SPORT qosymshasy smartfon nemese planshet kamerasy arqyly jattyǵýlardyń oryndalýyn tanýǵa jáne nátıjelerdi tirkeýge múmkindik beretin kompıýterlik kórý tehnologııalaryn paıdalanady. Platforma onlaın-chellendjder, marafondar men jarystar uıymdastyrýǵa múmkindik beredi.
Bul formattyń taǵy bir ereksheligi – sportshynyń naqty bir orynǵa baılanyp qalmaýy.
– Bizde tóreshiler bolmaıdy. Barlyq protsesti onlaın jasandy ıntellekt tóreshi baqylaıdy: ol sportshynyń tehnıkasyn jáne qansha jattyǵý oryndaǵanyn tirkeıdi. Bolashaqta adamnyń qaı jerde turǵany mańyzdy bolmaıdy. Mysaly, Qazaqstannyń bir qalasyndaǵy sportshy Amerıkadaǵy nemese Qytaıdaǵy qatysýshymen onlaın jarysa alady, – dedi ol.
Ǵ.Saltybaevtyń aıtýynsha, álemde tsıfrlyq tehnologııa men sportty ushtastyratyn túrli baǵyttar bar. Sonyń ishinde kıbersportta oıyndar djoıstık arqyly júrgizilse, fıdjıtal sportta fızıkalyq sport pen kompıýterlik oıyn elementteri biriktirilgen. Al jańa federatsııanyń ereksheligi – jarystar men jattyǵýlardy arnaıy qymbat qurylǵylarsyz, smartfon nemese planshet kamerasy arqyly ótkizý.
– Keıbir týrnırler VR kózildirigi arqyly ótkiziledi. Biraq mundaı qurylǵylar qymbat bolǵandyqtan, jappaı sportqa qoljetimdi bola bermeıdi. Bizdiń formatta qarapaıym telefon kamerasynyń kómegimen jattyǵýǵa jáne álemniń kez kelgen jerinen týrnırge qatysýǵa bolady. Sondyqtan bul jappaı sportqa barynsha qoljetimdi format dep sanaımyz, – dedi federatsııa prezıdenti.
Federatsııa aldaǵy ýaqytta Qazaqstan chempıonatyn onlaın formatta ótkizýdi josparlap otyr. Alǵashqy kezeńde ústel tennısi elementteri bar jattyǵýlar men Power Balance baǵyty qamtylady. Jyl sońyna deıin boks pen fýtbol boıynsha da onlaın týrnırler ótkizý kózdelgen.
– Aldymen Qazaqstan ishinde onlaın sport boıynsha Qazaqstan chempıonatyn ótkizýdi josparlap otyrmyz. Ústel tennısinen bastadyq. Sonymen qatar Power Balance jattyǵýlary bar. Osy eki baǵyttan bastaımyz. Jyl sońyna deıin boks pen fýtbol boıynsha da onlaın týrnırler ótkizýdi josparlap otyrmyz. Jalpy, bizde jappaı qoljetimdi on shaqty sport túrin tsıfrlandyrý jospary bar, – dedi Ǵabıt Saltybaev.
Federatsııa jumysynyń taǵy bir baǵyty – sportqa beıimi bar balalardy erte anyqtaý. Uıymdastyrýshylardyń aıtýynsha, onlaın jarystar arqyly balanyń reaktsııasy, ıkemdiligi jáne fızıkalyq múmkindikteri týraly bastapqy málimet jınaýǵa bolady. Bul derekter sporttyń qaı baǵytyna beıimi bar ekenin anyqtaýǵa kómektesedi.
– Bizdiń Ulttyq tsıfrlyq jáne AI-sport federatsııasynyń negizgi maqsattarynyń biri – Qazaqstan boıynsha jas talanttardy anyqtaý. Mysaly, ústel tennısi boıynsha týrnır kezinde bala jattyǵýlardy oryndap, óziniń reaktsııasy men ıkemdiligin kórsetedi. Biz osyndaı kórsetkishter arqyly talantty balalardy anyqtaı alamyz. Keıin olardyń tizimin tıisti sport federatsııalaryna nemese federatsııalardyń mektepterine usynyp, birlesip jumys isteýge múmkindik bar. Olar balalardy oflaın jarystarǵa shaqyryp, qabiletin ári qaraı synaı alady, – dedi ol.
Onyń pikirinshe, mundaı tásil sporttaǵy kásibı baǵdarǵa da kómektesýi múmkin.
– Bala kishkentaı kezinde ár sport túrine qatysyp kórmeıinshe, onyń naqty qaı baǵytqa beıimi bar ekenin anyqtaý qıyn. Sondyqtan onlaın týrnırler arqyly ártúrli fızıkalyq jáne reaktsııaǵa baılanysty jattyǵýlardy oryndatyp, balanyń talantyn erterek baıqaýǵa bolady. Bul sporttaǵy kásibı baǵdarǵa kómektesedi, – dedi federatsııa prezıdenti.
Sonymen qatar jańa federatsııa sporttyq jáne bilim berý uıymdarymen seriktestikti damytýdy josparlap otyr. Digital Bridge aıasynda Qazaq ulttyq sport ýnıversıtetimen memorandýmǵa qol qoıý kózdelgen. Yntymaqtastyq sport, ǵylym, bilim berý jáne jasandy ıntellekt tehnologııalaryn engizý baǵyttaryn qamtıdy.
Aldaǵy ýaqytta boks, fýtbol, basketbol elementteri bar jattyǵýlar jáne basqa da sport túrleri tsıfrlandyrylady. Osy arqyly onlaın jarystardyń aýqymyn keńeıtip, sportshylarǵa ornalasqan jerine qaramastan jarystarǵa qatysýǵa múmkindik berý kózdelip otyr.
Buǵan deıin halyqaralyq JI sarapshysy, Sinovation Ventures jáne 01.AI kompanııalarynyń bas dırektory Lı Kaı Fý Qazaqstannyń tolyqqandy jasandy ıntellekt ortalyǵyna aınalýy úshin ne qajet ekenin aıtqan edi.
