Bás tigýge qumar elordalyqtar ınternet-alaıaqqa aldanyp qaldy
NUR-SULTAN. QazAqparat - Sporttyq oıyndarǵa bás tigip, oljaǵa keneltýge ýáde etken alaıaq elordalyqtardyń 30 mln teńgesin ıemdendi, dep habarlaıdy QazAqparat tilshisi.
Nur-Sultan qalalyq Polıtsııa departamentinen málim etkendeı, jas jigit adamdardyń senimin paıdalanyp, olarǵa sporttyq básterge boljam jasap beretinin jáne eki eselengen tabysqa keneltetinin aıtqan.
«Ol Instagram áleýmettik jelisi arqyly jalǵan akkaýnttardy ashyp, qoldanýshylarǵa aqshalaryn kóbeıtip berýge ýáde bergen. Aqsha tigýdiń somasy 30 myń teńgege deıin jetken. Áleýmettik jeli qoldanýshylary aldanyp, alaıaqtyń jeke esep shotyna aqsha aýdaryp otyrǵan. Kerekti soma shotyna túsken soń, nómiri men akkaýnttaryn óshirip kelgen», - dedi polıtsııadan.
Osylaısha, Temirtaý qalasynyń turǵyny elordalyq 30 azamattyń 1 mıllıon teńgege jýyq aqshasyn jymqyrǵan.
Qazirgi ýaqytta kúdiktiniń ústinen QR QK-niń 190-baby boıynsha (alaıaqtyq) sotqa deıingi tergeý amaldary júrgizilýde.
Internet arqyly alaıaqtyq jasaıtyndar respýblıkanyń basqa óńirlerinde kezdesip jatady. Ótken aıda Túrkistan oblysynda ınternet arqyly jumys usynǵan alaıaqqa turǵyndar 4,5 mln teńgege jýyq qarjy salyp aldansa, Qostanaı oblysynda 20 myń teńgege kólik satpaq bolǵan ınternet-alaıaq ustalǵan bolatyn.
